શરીરસંબંધ માટે બાલી ઉંમરને યોગ્ય ગણી શકાય?

દેશના કાયદા ૧૮ વર્ષથી નાની વયની યુવતી સાથેના જાતીય સંબંધને અવૈધ લેખાવે છે. લગ્ન માટે પણ યુવતીની લઘુતમ ઉંમર એ જ ઠેરવવામાં આવી છે. એ કાનૂનને ચાતરી કે બદલીને ૧૫-૧૬ વર્ષની છોકરી સ્વેચ્છાએ ૧૮-૧૯ની ઉંમરના યુવક સાથે જાતીય સંબંધ રાખે એને માન્ય રાખવા આપણી સરકાર, આપણી અદાલત અને મૂળ તો આપણો સમાજ તૈયાર થશે?

- હીરેન મહેતા

લોકસભાની મુદત પૂરી થવા આવી છે ત્યારે સર્વોચ્ચ અદાલતે સંસદ સામે અટપટો સવાલ મૂક્યો છે.

સવાલ આ બહુ પેચીદો અને સંવેદનશીલ છે. એ માટે દેશનો પ્રવર્તમાન કાયદો પણ આ એ બદલવો પડે એમ છે અને એટલે જ સર્વોચ્ચ અદાલતે કેન્દ્ર સરકાર અને મહિલા આયોગનો અભિપ્રાય માગ્યો છેઃ અઢાર વર્ષથી ઓછી ઉંમરનાં યુવક-યુવતી (કાયદાની દષ્ટિએ બાળક) સ્વેચ્છાએ શારીરિક સંબંધ બાંધે તો એને ગુનો ગણવો કે નહીં? 

લોકસભાની અને એ રીતે મોદી સરકારની આ વખતની મુદત પૂરી થવા આવી છે ત્યારે સર્વોચ્ચ અદાલતે એની સામે આવેલી જાહેર હિતની અરજી પર સરકારને પ્રતિસાદ આપવા કહ્યું છે. સંસદના હમણાં જ પૂરા થયેલા સત્રમાં સરકારે જે કાયદો બદલવાનો પ્રસ્તાવ મૂક્યો છે એ ભારતીય દંડસંહિતા (આઈપીસી)ની કલમ ૩૭૫ હેઠળ ૧૬ વર્ષથી નાની કન્યાની મંજૂરી સાથે કોઈ યુવક એની સાથે સંબંધ બાંધે તો પણ એ અપરાધ છે. દિલ્હીના બહુચર્ચિત નિર્ભયા સામૂહિક બળાત્કાર અને હત્યા કેસ પછી અમલમાં આવેલા પોક્સો ઍક્ટ મુજબ તો આ વયમર્યાદા ૧૮ વર્ષની ઠેરવવામાં આવી છે અને એના ઉલ્લંઘન બદલ પુરુષ પર જાતીય હુમલાનો ગુનો દાખલ થઈ શકે છે.