ન્યુ લુકની સરપ્રાઈઝ

હીરો બનતાં બનતાં જોજો થોબડું ન રંગાઈ જાય!

- સુષમા શેઠ

શ્રાવણ માસ હોવાથી અમિતે વાળ કપાવ્યા નહોતા. વાળ વધારી માથે નાનકડી પોનીટેલ બાંધી દીધેલી, એ જોઈ ગીતાબહેન બગડ્યાં ‘આ શું છોકરીઓની માફક વાળની પોની બાંધી. આવું કંઈ શોભે? વાળ વધી ગયા છે તે કપાવી આવ.'

‘ફૂલ, મૉમ. આ પણ એક સ્ટાઈલ છે. જુઓને, કેટલી ગરમી છે એટલે બાંધી દીધા. કાલે હેર કટ કરાવી આવીશ, બસ.'

‘હમ્.. લેટેસ્ટ સ્ટાઈલમાં કપાવજે. મારા પાર્લરમાં હેર કટ માટે જે આવે એને ફેસ પ્રમાણે કેવી સ્ટાઈલ સૂટ થાય એ હું સજેસ્ટ કરું.’ આશીએ સૂચન આપ્યું.

અમિત હંમેશાં જ્યાં વાળ કપાવતો હતો એ બબલુ હેર કટિંગ સલૂનના બબલુભાઈ પાસે ગયોઃ ‘મસ્ત લેટેસ્ટ સ્ટાઈલમાં હેર કટ કરી આપ, દોસ્ત.’

‘બવ વખતે દેખાણા, અમિતભે. બોલો રણવીર રૉકી જેવા, કાર્તિક ભૂલભૂલૈયા કટ કે પછી રણબીર મક્કાર સ્ટાઈલ કાપું? હું ક્યોછ?’ બટકા બબલુએ નૅપ્કિનથી હાથ લૂછતાં પૂછ્યું. ઊંચી ખુરસી પર બેઠેલા લાંબા કસ્ટમર્સના માથાના અગ્રભાગ સુધી પહોંચવા એ પોતાના પગ હેઠળ ઑર્ડરથી બનાવડાવેલો એક ખાસ પાટલો રાખતો, જેના પર ઊભા રહી એ હેર કટ કરતો.

‘ટૂંકા કરી નાખ. આ લાંબા વાળને લીધે ગરમી થાય છે. આમીર ખાન સ્ટાઈલ કેમ રહેશે?’

‘ઊંહૂં. એમાં એવું છે ને કે માથાની માથે આડાઅવળા હળિયા રાખીને પછી બાલ કાપવા પડે ને પછી ગજનીની જેમ શૉર્ટ ટર્મ મેમરી લૉસ થવાનો ડર રહે એમાં મને ટિપ આપવાનું તમે ભૂલી જાવ. એના કરતાં હું એમ કઉંછ કે તમે મારી માથે ભરોહો રાખો, તમને એવી ફક્કડ સ્ટાઈલ કરી દવ કે હો જોતાં રે જાય. હું ક્યોછ?’ બબલુ બોલ્યો.

‘તો શાહરુખ જેવા?’

‘એવા એક કદંબરના કાઈપા'તા. પછી ઈ રસ્તા વચ્ચે ગમે તિયારે હાથ પહોળા કરી ઊભો રે જાતો અને કકક.. કરવા માંડતો એમાં એની બૈરીએ એના કાકડાનું ઑપરેશન કરાવી દીધું. પછી ઈ સ્ટાઈલ હમૂળગી બંધ કઈરી. સાઈડ કટની સાઈડ ઈફેક્ટ આવી ભયંકર હશે એવી મને નો'તી ખબર.'

‘સારું. લેટેસ્ટ કરજે.’ બબલુનું હું ક્યોછ? રિપીટ થાય એ પહેલાં અમિતે કહી દીધું.

‘લેટેસ્ટમાં તો જવાન ફિલમની જેમ સસ્પેન્સથી ભરપૂર પાંચ ડિફરન્ટ લુક છે. તમને કયો ગમેછ?’

‘સસ્પેન્સ ઊભું કર્યા વગર કાપવા માંડ.’