સરકારે આ ભાર વેંઢારવાની જરૂર છે ખરી?

કાર અકસ્માત, દારૂકાંડ કે બીજાના વાંકે થતા અપરાધમાં પણ સરકાર મૃતકોના પરિવારને વળતર આપે છે. સમય આવી ગયો છે ખરા ગુનેગારને દંડવાનો અને એ રકમમાંથી અસરગ્રસ્તોને સહાય આપવાનો.

- હીરેન મહેતા

કુછંદે ચડી ગયેલા, શરાબ કે બીજી કોઈ ચીજના નશામાં યુવાનો દ્વારા અકસ્માતના પ્રમાણમાં હમણાં હમણાં બહુ વધારો થઈ રહ્યો છે. મૂળ તો અમુક લોકોની આવકમાં ધરખમ વૃદ્ધિ થઈ છે. આપણે ત્યાં એને ઘણા આંધળી કમાણી તરીકે ઓળખે છે. માણસ સીધી રીતે વધારે કમાય એમાં કોઈને વાંધો ન હોઈ શકે. એમ તો માણસ આડે રસ્તે કમાણી કરે તોય કોઈ કંઈ કરી શકતું નથી. સવાલ એ કમાણી પચાવવાનો છે. એ કમાણી પચાવવા જેટલું પેટ અને એ પચાવવા જેવું ગજું ન હોય તો એવો પૈસો એની સાથે અનેક અનિષ્ટ નોતરે. એવા પરિવારના છોકરા અપાર સંપત્તિને કારણે છકી જાય એવું બને. પૈસો મહેનતનો ન હોય એટલે છોકરાઓને મન એ પૈસાનું મૂલ્ય પણ ન હોય. એ નબીરા પછી પૈસાના ઘમંડમાં કંઈ પણ કરે અને ઘણાખરા કિસ્સામાં જોવા મળે છે એમ, સાવ સામાન્ય માણસ એનો ભોગ બને.

છેલ્લા એક-દોઢ મહિના દરમિયાન મહારાષ્ટ્રમાં દારૂના નશામાં કોઈ જુવાનિયાએ અકસ્માત કર્યો હોય એવા ત્રણ-ચાર કેસ બહુ ગાજ્યા. દેશમાં આમ તો બધે જ આવા કિસ્સા બનતા રહે છે. પૈસા અને જુવાનીના તોરમાં દારૂનો નશો ભળે, એમાં બેફામ ડ્રાઈવિંગથી કોઈનો જાન જાય. વર્ષોનાં વર્ષ કેસ ચાલે રાખે અને પછી બધું ભુલાઈ જાય. મૃતકના પરિવાર ન્યાયની વાંઝણી આશા રાખીને બેસી રહે. એમને મળે તો બસ, સરકાર તરફથી એક-બે લાખ રૂપિયાની મદદ.

આવી વૈભવી કાર ચલાવતા નબીરાથી અકસ્માત થાય તો વળતરની રકમ એની પાસેથી જ કેમ વસૂલ ન થાય?

સરકારી ભાષામાં આવી ચુકવણીને એક્સ-ગ્રેશિયા તરીકે ઓળખવામાં આવે છે. અકસ્માત કરે કોઈ, પણ મૃતકના પરિવારને વળતરના નામે મદદ આપે સરકાર. રાજકોટના કોઈ મેળામાં આગ લાગે ને એકસોથી વધુ લોકો જીવતા ભૂંજાઈ જાય એમાં આર્થિક સહાય આપે સરકાર. ઉત્તર પ્રદેશના હાથરસમાં એક બાબાના આશ્રમમાં ભીડભાડને કારણે સો-એકસો વીસ જણ ચગદાઈને ઈશ્વરશરણ થાય તો મૃતકોના કુટુંબીજનોને એક-બે લાખનું વળતર સરકાર આપે. ક્યાંક કોઈક ઠેકાણે લઠ્ઠો કે વિખારી બની ગયેલો દારૂ પીને પચ્ચીસ-પચાસ જણ ખપી જાય તો પણ માનવતાના ધોરણે સરકારશ્રી એ દરેકના પરિવારને આર્થિક મદદ પહોંચતી કરે.