લડાખ નહીં, આ તો લસણની માર્કેટમાં સુદ્ધાં ચીનની ઘૂસણખોરી

ચાઈનીઝ મોબાઈલ, ચાઈનીઝ માંજો તથા ચાઈનીઝ રમકડાં સહિતની ચીનની કેટલીક ચીજનો વિરોધ થતો સાંભળ્યો છે, પણ હવે એક નવી ચાઈનીઝ ચીજ સામે દેશભરમાં, ખાસ તો ગુજરાતમાં વિરોધનો વંટોળ ઊભો થયો છે. આ છે ચીનનું લસણ. આરોગ્ય માટે હાનિકારક હોવાથી ભારતમાં ચાઈનીઝ લસણ પર પ્રતિબંધ હોવા છતાં સૌરાષ્ટ્રના કેટલાક યાર્ડમાં એનો પગપેસારો બબાલનું કારણ બન્યો છે.

- દેવેન્દ્ર જાની (રાજકોટ)

ગુજરાતના માર્કેટ યાર્ડોમાં સામાન્ય રીતે ખેડૂતો અને એજન્ટોના પ્રશ્નોના મુદ્દે આંદોલન થાય અને ક્યારેક હડતાળ પણ પડે. જો કે હમણાં પહેલી વાર માત્ર એક જણસ એટલે કે ચાઈનીઝ લસણના વિરોધમાં વેપારી-એજન્ટ ઍસોસિયેશન દ્વારા કામકાજ બંધ રાખવામાં આવ્યું. સૌરાષ્ટ્રના સૌથી મોટા એવા ગોંડલ ઉપરાંત રાજકોટ સહિતના યાર્ડના વેપારીઓ આ બંધમાં જોડાયા.

ગુજરાતી સ્વાદશોખીન પ્રજા છે. કેટલાક ચોક્કસ ધર્મ તથા સંપ્રદાયને બાદ કરતાં ગુજરાતીઓની રસોઈમાં લસણનો ઉપયોગ સામાન્ય ગણાય છે. લસણનો તીખો સ્વાદ અને ખાસ તો એની સોડમ ઘણાને ગમે છે અને એ જ ભારતીય લસણની ખાસિયત છે. જો કે છેલ્લા કેટલાક વખતથી લસણ રૂપે ચીન આપણી થાળીમાં પગપેસારો કરી રહ્યું છે. ભારત કરતાં ચીનના લસણની ગુણવત્તા ઘણી ઊતરતી છે, પરંતુ સસ્તું હોવાને કારણે કેટલાક વેપારી હવે બજારમાં ચીની લસણ ઠાલવતાં થયા છે, એની આયાત પર પ્રતિબંધ હોવા છતાં!

રંગ, સોડમ અને બીજી લાક્ષણિકતાને કારણે અલગ પડતું ચાઈનીઝ લસણ સૌરાષ્ટ્ર સુધી પણ કરી રાખ્યું એના વિરોધમાં ગોંડલ યાર્ડના વેપારીઓએ પાળ્યો બંધ.

એવો એક કિસ્સો હમણાં ગુજરાતમાં બન્યો અને ખાસ્સો ગાજ્યો પણ ખરો. એ જ કારણે ગુજરાતના માર્કેટ યાર્ડમાં એક દિવસ બંધ પાળવામાં આવ્યો. ગુજરાતમાં ચીની લસણને કારણે જે વિવાદ જાગ્યો એની શરૂઆત સૌરાષ્ટ્રના સૌથી મોટા ગોંડલ યાર્ડથી થઈ. ગોંડલ યાર્ડમાં એક દિવસ લસણની જે આવક થઈ રહી હતી એમાં આશરે ૩૦ કટ્ટા (મણ) ચાઈનીઝ લસણનો માલ ઊતર્યો હોવાનું કેટલાક વેપારીઓના ધ્યાનમાં આવ્યું. એમણે તરત યાર્ડના હોદ્દેદારોને જાણ કરી. યાર્ડના ચૅરમૅન-વેપારીઓએ માલની ખરાઈ કરીને સરકારના કૃષિ વિભાગ અને પોલીસ સુધી વાત પહોંચાડતાં ભારતમાં પ્રતિબંધિત માલ કેવી રીતે ઘૂસી ગયો એની તપાસ શરૂ કરવામાં આવી. આ લસણના નમૂના જૂનાગઢ કૃષિ યુનિવર્સિટીમાં પણ મોકલવામાં આવ્યા. પછી તો આખો મામલો રાજકોટ સહિત અન્ય યાર્ડ સુધી પહોંચ્યો. આમ લસણનો આ વિરોધ વંટોળનું સ્વરૂપ લઈ રહ્યો છે.