ഇവരെ നമുക്ക് രക്ഷിക്കാനാകും

ജോലിഭാരം കൊണ്ടും മാതാപിതാക്കളുടെ നിസ്സാര കുറ്റപ്പെടുത്തുലുകൾകൊണ്ടും ആത്മഹത്യ ചെയ്യുന്നവരുടെ എണ്ണം കൂടിക്കൊണ്ടിരിക്കുകയാണ്. അതും കൗമാരപ്രായമുള്ളവരും ചെറുപ്പക്കാരും! ഇന്ത്യയിൽ 2023ൽ 1,64,000 പേർ. കേരളത്തിൽ 10,160. എഴുപതു ശതമാനവും പുരുഷന്മാരാണ്.

- ഡോ. കെ.പി. പൗലോസ്

സാമ്പത്തിക തകർച്ച, ശാരീരിക, മാനസിക പീഡനങ്ങൾ, കുടുംബവഴക്കുകൾ, മനോരോഗങ്ങൾ എന്നിവകൊണ്ടുള്ള ആത്മഹത്യകൾ സാധാരണമാണ്. എന്നാൽ ഇപ്പോൾ ജോലിഭാരം കൊണ്ടും മാതാപിതാക്കളുടെ നിസ്സാര കുറ്റപ്പെടുത്തുലുകൾകൊണ്ടും പെട്ടെന്നുള്ള ആവേശത്താൽ ആത്മഹത്യ ചെയ്യുന്നവരുടെ എണ്ണം കൂടിക്കൊണ്ടിരിക്കു കയാണ്. അതും കൗമാരപ്രായമുള്ളവരും ചെറുപ്പക്കാരും! 2024 ജൂലൈ 20ന് ആത്മഹത്യ ചെയ്ത കൊച്ചി സ്വദേശിനി 26 വയസ്സുകാരി അന്ന് സെബാസ്റ്റ്യൻ എം.ബി.എയുടെ ദാരുണകഥ ഈയിടെ മാധ്യമങ്ങളിൽ വന്നിരുന്നല്ലോ. ഉത്തർപ്രദേശിൽ ബജാജ് ഫൈനാൻസിൽ ജോലി ചെയ്തിരുന്ന തരുൺ സക്സേന (42) ടാർജറ്റ് പൂർത്തീകരിക്കാൻ സാധിക്കാത്തതുകൊണ്ട് ജീവിതം അവസാനിപ്പിച്ച പത്രവാർത്തയും നാം വായിച്ചു. ഈ രണ്ട് ആത്മഹത്യകളും തങ്ങളുടെ ജോലി പോകുമോ എന്ന ഭീഷണി കൊണ്ടാണ്.

ഇന്ത്യയിൽ സ്വകാര്യ സ്ഥാപനങ്ങൾ, ഐ.ടി മേഖല പൊലീസ്, ആശുപ്രതികൾ, ബാങ്കുകൾ, പണമിടപാടുകൾ നടത്തുന്ന പ്രൈവറ്റ് സ്ഥാപനങ്ങൾ എന്നിവയിൽ ജോലി ചെയ്യുന്നവരുടെ ജോലിസമയത്തിന് ഒരു ക്ലിപ്തതയും ഇല്ലെന്ന് ആരോപണങ്ങളുണ്ട്. ഇന്ത്യാക്കാർ ആഴ്ചയിൽ ശരാശരി 46.7 മണിക്കൂർ ജോലി ചെയ്യുമ്പോൾ വികസിത രാജ്യങ്ങളായ കാനഡ, നെതർലാൻഡ്സ് എന്നീ രാജ്യങ്ങളിലെ ജോലിസമയം ആഴ്ചയിൽ ശരാശരി 31-32 മണിക്കൂറാണ്. ഗൾഫ് രാജ്യങ്ങളിൽ (യു.എ.ഇ.) 50.9 മണിക്കൂർ ആണ്. ഇന്ന് ശരാശരി ജോലിസമയത്തിന്റെ കാര്യത്തിൽ ഇന്ത്യയ്ക്ക് 13-ാം സ്ഥാനമാണ് (രാജ്യാന്തര തൊഴിൽസംഘടനാ കണക്ക്).