ఈ వారం కధ

మరో ప్రపంచం

- సింగంపల్లి శేష సాయి కుమార్ 8639635907

ఊరంతా ఎక్కడ చూసినా పండగ కోలాహలం, ప్రతి ఇంట్లో ఎవరి హడావిడిలో వాళ్ళున్నారు. ఇంటి ముందు రంగు రంగుల ముగ్గులు, గడపలకు మామిడాకు తోరణాలు, బంతి పూల హారాలతో మా ఇల్లు బాగుండంటే, కాదు మాదే నంటూ పోటీ పడేలా ఉన్నాయి.

అందరిండ్లల్లో లైట్ల కాంతి మిరుమిట్లు గొలుపుతుంటే, పిండి వంటల ఘుమ ఘుమలు నాలుకకు నాట్యం నేర్పుతున్నాయి. ఎక్కడ ఏ ఇంట్లో చూసినా జనం ఒంటరిగా లేరు. అందరి ఇండ్లు మనుషులతో నిండి పోయాయి, మాటలతో తడిసిపోతున్నాయి. రామాలయం వీధి వెనుక చిన్న సందు, ఒకరు కాలు బయట పెడితే మరొకరు లోపల ఉండాల్సిందే, అందులో ఉండే ఇండ్లన్ని ఇరుకుగా ఉన్నా వాళ్ళ సందడి ముందు అవేమీ కనపడటం లేదు. అక్కడే ఉంది నరసమ్మ, పండు ముదుసలి, చర్మం అంతా ముడతలు పడిపోయింది. పాత మాసిన నూలు చీర ఒంటికి చుట్టుకొని ఉంది అదికూడా ఆమె శరీరానికి నిలవడం లేదు. చూడటానికి అమ్మలకు అమ్మ మాదిరి కనపడుతుంది.

ఇల్లు కేవలం నాలుగు అడుగులు ఉంది, అందులోని బాత్రూం, మరోవైపు పొయ్యి, దానిపై బాగా అడుగంటిన గిన్నె, అందులో మాడిన నల్లటి తెల్ల బియ్యం అన్నం అది మునిగేటట్లు నీళ్ళు. పక్కనే చిన్న గిన్నెడు నీళ్ళు దానిపై ఓ పాత సొట్ట బడిన లోటా.

**** **