కురుమూర్తి జాతర ఉత్సవాలు ప్రారంభం

• రాష్ట్రంలో ప్రతి ఏటా జరిగే జాతరల్లో 'కురుమూర్తి' జాతర ఒకటి

• నెలరోజులపాటు ఘనంగా జరగనున్న జాతర

• ఈ నెల 10న దైవ దర్శనానికి ముఖ్యమంత్రి రేవంత్ రెడ్డి

• ఏర్పాట్లు పూర్తి చేస్తున్న అధికారులు

మహబూబ్నగర్ నవంబర్ 08 (ఆదాబ్ హైదరాబాద్): కార్తీక మాసం సందర్భంగా రాష్ట్రంలో ప్రతి ఏటా జరిగే జాతరల్లో 'కురుమూర్తి' జాతర ఒకటి. ఈ జాతరకు లక్షలాది సంఖ్యలో భక్తులు తరలివస్తుంటారు. మహబూబ్ నగర్ జిల్లా చిన్న చింతకుంట మండలం అమ్మాపూర్ సమీపంలో సప్తగిరుల మధ్య ఈ ఆలయం కొలువై ఉంది. మహబూబ్ నగర్ జిల్లాలో కురు మూర్తి జాతర ఉత్సవాలు ఘనంగా సాగుతున్నాయి. ఈ జాతర దాదాపు నెల రోజులపాటు జరుగుతుంది. కురుమూర్తి జాతరలో “ఉద్దాలు”(ఉద్గాలోత్సవం) అనే ఉత్సవం వైభవంగా జరుపుతారు. తెలంగాణ తిరుపతి, పేదల తిరుపతిగా కురుమూర్తి జాతరకు పేరుంది. దీపావళి సందర్భంగా నవంబర్ నెలలో శ్రీకురుమూర్తి స్వామి బ్రహ్మోత్సవాలు నవంబర్ 8 (శుక్రవారం) నుండి ప్రారంభమయ్యాయి. సుమారు నెల రోజుల పాటు ఈ ఉత్సవాలు కొనసాగ నున్నాయి. కురుమూర్తిలో కొలువైన వేంకటేశ్వరుడు..కురుమూర్తి రాయుడిగా పూజలందుకుంటాడు.