சமதர்ம இந்தியாவை உருவாக்க பணியாற்ற வேண்டும்

மதச் சார்பற்ற, சகோதரத்துவ, சமூகநீதி இதை எல்லா வற்றையும் உள்ளடக்கிய சமதர்ம இந்தியாவை உருவாக்க வேண்டும் என்பதற்காக நாம் அனைவரும் அவர் வழியிலே நின்று பணியாற்ற வேண்டும் என்று மார்க்சிஸ்ட் கம்யூனிஸ்ட் கட்சியின் பொதுச் செயலாளர் சீதாராம் யெச்சூரி படத்திறப்பு மற்றும் நினைவேந்தல் நிகழ்ச்சியில் தமிழ் நாடு முதல்வர் மு.க.ஸ்டாலின் கூறினார்.

தமிழ்நாடு முதல்வர் மு.க.ஸ்டாலின் நேற்று சென்னை, காமராஜர் அரங்கத்தில் நடைபெற்ற சீதாராம் யெச்சூரி படத்திறப்பு மற்றும் நினைவேந்தல் நிகழ்ச்சியில் பேசியதாவது:

சீதாராம் யெச்சூரி மறைவு, என்னை அதிர்ச்சி அடைய வைத்தது. அவருடைய உடல்நலம் பாதிக்கப் பட்டிருந்தபோது, நான் அமெரிக்காவில் இருந்து தொடர்பு கொண்டு தொடர்ந்து அவரைப்பற்றி விசாரித்துக் கொண்டே இருந்தேன். எப்படியாவது உடல் நலம் பெற்று அவர் திரும்பி விடுவார் என்று தான் நம்பிக் கொண்டிருந்தோம். ஆனால், நம் எல்லோரையும் வருத்தமடைய செய்யும் வகையில், அவர் நம்மை எல்லாம் விட்டு பிரிந்து விட்டார் என்ற சூழ்நிலை ஏற்பட்டுவிட்டது.

யெச்சூரி மார்க்சிஸ்ட் கம்யூனிஸ்ட் கட்சிக்கு மட்டும் சொந்தமல்ல! எங்களுக்கும் சொந்தம். அனைவருக்கும் சொந்தமானவர். எல்லோருக்கும் சொந்தமானவராக அவர் விளங்கி நின்றார். வாழ்ந்தார், வாழ்ந்து காட்டியிருக்கிறார். எடுத்துக்காட்டியிருக்கிறார். வழிகாட்டியிருக்கிறார். இந்தியாவின் கருத்தியல் அடையாளங்களில் ஒருவராக இருக்கிறார் என்றால் நிச்சயமாக நாம் அவரைத் தான் குறிப்பிடவேண்டும். அவரின் இழப்பு என்பது ஒரு கருத்தியலுக்கான இழப்பாக அமைந்துவிட்டது.