தீபாவளி பண்டிகைக்கு இன்னும் 3 நாட்களே உள்ள நிலையில் கடை வீதிகளில் அலைமோதிய கூட்டம்

ஜவுளி, பட்டாசு, இனிப்பு விற்பனை களைகட்டியது சொந்த ஊர் செல்ல பஸ், ரயில் நிலையங்களில் குவிந்தனர்

தீபாவளி பண்டிகைக்கு (அக். 31) இன்னும் 3 நாட்கள் மட்டுமே எஞ்சியுள்ள நிலையில், தமிழகம் முழுவதும் துணிகள் வாங்க நேற்று மக்கள் கூட்டம் அலைமோதியது. ஞாயிற்றுக்கிழமை விடுமுறை என்பதாலும் தமிழகம் முழுவதும் ஜவுளிக் கடைகளில் கூட்டம் கட்டுக்கடங்காமல் நிரம்பி வழிந்தன. சென்னையில் இருந்து சொந்த ஊர்களுக்கு பேருந்துகள், ரயில்களில், விமானங்களில் செல்ல மக்கள் தயாராகி வருகின்றனர். இதேபோல பலகாரக் கடை, பட்டாசு கடைகளிலும் விற்பனையும் களைகட்டியது.

தீபாவளி பண்டிகை வருகிற 31ம் தேதி (வியாழக்கிழமை) கொண்டாடப்படுகிறது. தீபாவளியை பொதுமக்கள் புத்தாடை உடுத்தியும், பட்டாசுகள் வெடித்தும், நண்பர்கள்-விருந்தினர்களுக்கு இனிப்புகளை வழங்கியும் கொண்டாடுவது வழக்கம். இந்நிலையில் தீபாவளி பண்டிகைக்கு இன்னும் 3 நாள் மட்டுமே எஞ்சியுள்ளது. இருந்தாலும் பொதுமக்கள் தீபாவளி ‘பர்சேஸ்’ செய்வதை ஒரு மாதத்திற்கு முன்னரே தொடங்கினர்.

நேற்று ஞாயிற்றுக்கிழமை விடுமுறை தினம் என்பதால் காலைமுதல் தீபாவளி பொருட்கள் வாங்க மக்கள் படையெடுத்தனர். இதனால், தமிழகம் முழுவதும் பஜார் வீதிகளில் தீபாவளி விற்பனை நேற்று களைகட்டின. சென்னையை பொறுத்தவரை கடை வீதிகளில் கடந்த ஒரு மாதமாகவே கூட்டம் அதிகமாக காணப்பட்டது. சென்னையின் முக்கிய வணிக பகுதிகளான தி.நகர், புரசைவாக்கம், பிராட்வே, மயிலாப்பூர், வண்ணாரப்பேட்டை, தாம்பரம், குரோம்பேட்டை உள்ளிட்ட பல்வேறு பகுதிகளில் மக்கள் கூட்டம் அலைமோதியது.