முறைகேடுகள் நடப்பதை தடுக்க நீட் தேர்வை ஆன்லைனில் நடத்தலாம்

புதுடெல்லி: ‘முறைகேடுகள் நடப்பதை தடுக்க நீட் உள்ளிட்ட நுழைவுத்தேர்வுகளை ஆன்லைனில் நடத்த வேண்டும், தேர்வு கண்காணிப்பாளர்கள் மற்றும் தேர்வு மையங்களை அவுட்சோர்சிங் செய்வது குறைக்கப்பட வேண்டும், எத்தனை முறை நீட் தேர்வை எழுதலாம் என்பதில் கட்டுப்பாடு கொண்டு வர வேண்டும்’ என ஒன்றிய அரசுக்கு உயர்மட்ட குழு பரிந்துரை செய்துள்ளது. மருத்துவ இளங்கலை படிப்புகளுக்கான நீட் நுழைவுத்தேர்வு கடந்த மே மாதம் நடந்தது. இதில் பல்வேறு குளறுபடிகள் நடந்ததாக மாணவர்கள், பெற்றோர்கள் தரப்பில் குற்றச்சாட்டுகள் எழுந்தன.

வினாத்தாள் கசிந்ததாகவும், வினாத்தாள் திருத்துவதில் பல முறைகேடுகள் நடந்ததாகவும் குற்றம்சாட்டப்பட்டது. இதுமட்டுமின்றி யுஜிசி-நெட் தேர்வு வினாத்தாள் கசிந்ததால் அத்தேர்வு ரத்து செய்யப்பட்டது. இதே போல, நீட் பிஜி நுழைவுத்தேர்வும் ஒத்திவைக்கப்பட்டது. அடுத்தடுத்து நடந்த இந்த சம்பவங்களால், இத்தேர்வுகளை நடத்தும் தேசிய தேர்வு முகமை (என்டிஏ) மீதான நம்பகத்தன்மை குறித்து பல தரப்பினரும் கேள்வி எழுப்பினர். உச்ச நீதிமன்றத்திலும் பல வழக்குகள் தொடரப்பட்டன. சிபிஐ வழக்கு பதிவு செய்து விசாரணை நடத்தியது.