ரூ.2.85 கோடியில் ‘முதல்வர் படைப்பகம்’ ஒரே இடத்தில் படிக்கலாம் வேலையும் பார்க்கலாம்: மாணவர்கள், பணியாற்றுவோருக்கு ஒருசேர உதவும் அசத்தல் திட்டம்

சென்னை போன்ற பெருநகரங்களில் பெரும்பாலான குடும்பத்தினர் சமையல் அறை, ஒரு பெட்ரூம் அல்லது ஒரு சமையலறை, ஒரு பெரிய ஹால் போன்ற கட்டமைப்புடன் கூடிய வீடுகளில் வசித்து வருகின்றனர்.

சென்னை போன்ற பெரு நகரங்களில் வாடகையும் மிக அதிகம். உதாரணத்திற்கு கிராமப்புறங்களில் ரூ.3 ஆயிரம் கொடுத்து ஒரு வீட்டில் குடியிருக்க முடியும் என்றால், சென்னையில் அதே குடும்பத்தினர் குறைந்தது ரூ.7500 முதல் ரூ.10 ஆயிரம் வரை வாடகை செலுத்த வேண்டி இருக்கும். இதனால், பெரும்பாலான குடும்பத்தினர் அவர்களது குடும்ப வருமானத்திற்கு ஏற்ப வாடகை வீட்டில் வாழ்ந்து வருகின்றனர்.

இதில் பெரும்பாலும் அதிகம் பாதிக்கப்படுவது படிக்கும் மாணவ, மாணவிகளே. வீட்டில் உள்ள பெண்கள் டி.வி பார்க்கும்போது, வேறு வழி இல்லாமல் அதே அறையில் குழந்தைகளும் அமர்ந்து படிக்க நேரிடும். அதிகாலையில் சீக்கிரம் எழுந்து படிக்கும் போதும், நள்ளிரவு வரை படிக்கும்போதும் பல்வேறு இடையூறுகளை அவர்கள் சந்திக்க நேரிடுகிறது. இதனால் பெரும்பாலான குடும்பங்களில் குழந்தைகளுக்கு கற்றல் சிதைவுகள் ஏற்படுகின்றன.

அதேபோல, கொரோனாவுக்கு பிறகு பல நிறுவனங்களில் “ஒர்க் ப்ரம் ஹோம்” எனும் வீட்டிலிருந்தே வேலை செய்யும் புதிய நடைமுறை அமலில் இருந்து வருகிறது. ஆனால் வீட்டில் அமர்ந்து கொண்டே அலுவலக வேலைபார்ப்பது என்பது அவ்வளவு எளிதான காரியம் அல்ல. குடும்பச் சூழ்நிலையில் அலுவலக வேலை என்பது பெரும் இடையூறாகவே இருக்கும். ஒரு பெட்ரூம், ஒரு ஹால் உள்ள வீடுகளில் பெட்ரூமில் அமர்ந்து ஒரு நாள் முழுவதும் கதவை சாத்திவிட்டு வேலை பார்ப்பது மிகச் சிரமமான பணி. குழந்தைகள் தொந்தரவு தவிர்க்க முடியாததாக ஆகிவிடும்.