ஒன்றிய அரசின் நிதி ஆணைய குழுவுடன் முதல்வர் மு.க.ஸ்டாலின் இன்று ஆலோசனை

வரி பகிர்வு அடிப்படையில் நிதியை வழங்க வலியுறுத்துகிறார்

ஒன்றிய அரசின் 16வது நிதி ஆணைய குழுவுடன் முதல்வர் மு.க.ஸ்டாலின் இன்று ஆலோசனை நடத்துகிறார். இதில் தமிழகத்திற்கு வரி பகிர்வு அடிப்படையில் நிதியை வழங்க அவர் வலியுறுத்துவார் என தலைமைச் செயலக வட்டாரங்கள் தெரிவிக்கின்றன. மத்திய மற்றும் மாநில அரசுகளுக்கு இடையே நிதியை பகிர்ந்து அளிக்க இந்திய அரசியலமைப்பு சட்டம் 280-ன் படி ஒன்றிய அரசு நிதி கமிஷன் அமைக்கப்பட்டுள்ளது. உயரிய அதிகாரங்களை படைத்த நிதி கமிஷனை சேர்ந்தவர்கள் 5 ஆண்டுகளுக்கு ஒரு முறை அனைத்து மாநிலங்களுக்கும் சென்று ஆய்வு நடத்தி வருகின்றனர்.

இதன் அடிப்படையில் 16வது நிதி கமிஷன் தலைவர் அர்விந்த் பனகாரியா தலைமையிலான குழுவினர் நேற்று தமிழகம் வந்தனர். இந்த குழுவின் உறுப்பினர்களான அஜய் நாராயண் ஜா, ஆனி ஜார்ஜ் மேத்யூ, மனோஜ் பாண்டா, சவுமியாகாண்டி கோஷ், செயலாளர் ரித்விக் பாண்டே, இணைச் செயலாசளர் ராகுல் ஜெயின் உட்பட 12 பேர் சிறப்பு விமானம் மூலம் சென்னை வந்தடைந்தனர். அதன்பின்னர், கிண்டியில் உள்ள பிரபல தனியார் விடுதியில் தங்கி இருந்த நிதிக்குழு உறுப்பினர்களுக்கு முதல்வர் இரவு விருந்தினை ஏற்பாடு செய்திருந்தார்.