காஞ்சிபுரம், செங்கல்பட்டு மாவட்டத்தில் தேவாலயங்களில் கிறிஸ்துமஸ் விழா கொண்டாட்டம்

காஞ்சிபுரம், செங்கல்பட்டு மாவட்டங்களில் கிறிஸ்தவ தேவாலயங்களில் கிறிஸ்துமஸ் விழா கோலாகலமாக கொண்டாடப்பட்டது. ஏராளமான கிறித்தவர்கள் தேவாலயங்களில் குடும்பத்தோடு சிறப்பு பிரார்த்தனையில் ஈடுபட்டனர்.

உலகம் முழுவதும் கொண்டாடப்படும் கிறிஸ்துமஸ் தினத்தையொட்டி, நேற்று தமிழகத்தில் உள்ள அனைத்து கிறிஸ்துவ பேராலயங்கள், ஆலயங்களில் பல்லாயிரக்கணக்கான கிறிஸ்துவர்கள் பிரார்த்தனையில் ஈடுபட்டு கிறிஸ்துமஸ் தினத்தை கொண்டாடி மகிழ்ந்தனர். ஆண்டுதோறும் நடைபெறக்கூடிய இந்த கிறிஸ்துமஸ் பிரார்த்தனையில், ஏராளமானோர் கலந்து கொண்டு பிரார்த்தனையில் ஈடுபட்ட நிலையில் இவ்வாண்டு நடைபெற்ற பிரார்த்தனையில் அதிகளவிலான கிறிஸ்துவர்கள் பெருந்திரளாக தங்களது குடும்பத்தாருடன் உற்சாகத்துடன் பங்கேற்றனர்.

இந்நிலையில், காஞ்சிபுரத்தில் கிறிஸ்துமஸ் தின கொண்டாட்டம் களைக்கட்டியது. காஞ்சிபுரம் தாமல் வார்த்தெருவில் அமைந்துள்ள தூய இதய அன்னை ஆலயத்தில் உலக நன்மை வேண்டியும், கொடுமையான நோய் உலகை விட்டு அகல வேண்டியும், சகோதரத்துவத்தை வலியுறுத்தியும் சிறப்பு கூட்டு பிரார்த்தனை நிகழ்ச்சி நடைபெற்றது.

இதில், திரளான கிறிஸ்துவர்கள் தங்கள் குழந்தைகளுடன் குடும்பமாக ஒன்றிணைந்து கலந்துகொண்டு இயேசு கிறிஸ்துவிடம் அவர்களது வேண்டுதலை நிறைவேற்றக்கோரி தீவிர பிரார்த்தனையில் ஈடுபட்டனர்.

மேலும் மனித நேயம், கருணை, அன்பு, சகோதரத்துவம் உள்ளிட்டவைகளை வெளிப்படுத்தும் விதமாகவும் கிறிஸ்துவர்கள் இந்த கிறிஸ்துமஸ் தினத்தினை கொண்டாடி மகிழ்ந்தனர்.