அரசியல் சாசனத்தை சீர்குலைக்கிறது பாஜக: வயநாட்டில் பிரியங்கா காந்தி பிரசாரம்

அரசியல் சாசன மதிப்பீடுகளை மத்திய பாஜக அரசு தொடர்ந்து சீர்குலைத்து வருவதாக காங்கிரஸ் பொதுச் செயலாளர் பிரியங்கா காந்தி குற்றம் சாட்டினார்.

கேரள மாநிலம், வயநாடு மக்களவைத்தொகுதி இடைத்தேர்தலில் போட்டியிடும் அவர், மீனங்காடி பகுதியில் தனது இரண்டாம் கட்டப் பிரசாரத்தை திங்கள்கிழமை தொடங்கி வைத்துப் பேசியதாவது:

சமூகத்தில் அச்சம், கோபம், துன்பம் ஆகியவற்றை மத்திய பாஜக அரசு பரப்பி வருகிறது. சிறுபான்மை இனத்தவருக்கு எதிராக தாக்குதல்கள் நடப்பதை நீங்கள் கண்டீர்கள். மணிப்பூரில் நடைபெற்ற தாக்குதல்களையும் கண்டீர்கள். திட்டமிடப்பட்ட வகையில் கோபமும், வெறுப்பும் பரப்பப்படுகின்றன.