தமிழகத்தின் நிதி உரிமைக்கு குரல் எழுப்புங்கள்

திமுக எம்.பி.க்களுக்கு முதல்வர் அறிவுரை

சென்னை, நவ.22: நாடாளுமன்றத்தில் தமிழகத்தின் நிதி உரிமையை வலியுறுத்துமாறு திமுக எம்.பி.க்களுக்கு அக்கட்சியின் தலைவரும் முதல்வருமான மு.க.ஸ்டாலின் அறிவுறுத்தினார்.

நாடாளுமன்ற குளிர்காலக் கூட்டத்தொடர் நவம்பர் 25-இல் தொடங்க உள்ள நிலையில், அண்ணா அறிவாலயத்தில் திமுக எம்.பி.க்களின் கூட்டம் கட்சியின் தலைவரும் முதல்வருமான மு.க.ஸ்டாலின் தலைமையில் வெள்ளிக்கிழமை (நவ.22) நடைபெற்றது. பொதுச்செயலர் துரைமுருகன், பொருளாளர் டி.ஆர். பாலு, நாடாளுமன்ற திமுக குழுத்தலைவர் கனிமொழி உள்ளிட்ட எம்.பி.க்கள் கூட்டத்தில் பங்கேற்றனர்.

ஒரு மணி நேரத்துக்கும் மேலாக நடைபெற்ற கூட்டத்தில் முதல்வர் ஸ்டாலின் பேசியது: மத்தியில் 3-ஆவது முறை ஆட்சி அமைத்த பிறகு பாஜகவிடம் முன்புபோல பரபரப்பு இல்லை என்று சொன்னாலும், தங்களுடைய திட்டங்களை எப்படியாவது நிறைவேற்றுவதில் கவனமாக இருக்கின்றனர்; அதற்கு நாம் இடம் கொடுத்துவிடக்கூடாது.

நிதி நெருக்கடி: தமிழகம் எதிர்கொண்டிருக்கும் நிதி நெருக்கடி, தமிழகத்துக்கான தேவைகள் என்ன என்று தீர்மானத்தில் கூறப்பட்டுள்ளது. அவைகுறித்து திமுக எம்.பி.க்கள் பேச வேண்டும். தமிழக அரசை நடத்துவதில் நாம் எதிர்கொண்டிருக்கும் மிகப் பெரிய பிரச்னையே நிதி நெருக்கடிதான். அதனால், நிதி உரிமைகளைப் பெறும் வகையில் திமுகவினர் பேச்சு அமைய வேண்டும். மத்திய அரசின் பெரிய திட்டங்கள் தமிழகத்துக்கு வருவதில்லை என்பதைக் குறிப்பிட்டுப் பேசி, புதிய திட்டங்களை தமிழகத்துக்கு கொண்டுவர முயற்சி செய்யுங்கள்; நாடாளுமன்றத்தில் திமுக எம்.பி.க்கள் மென்மையாகப் பேசக்கூடாது; கடுமையாகப் பேச வேண்டும்.