ஒரே நாடு, ஒரே தேர்தல் மசோதா: மத்திய அமைச்சரவை ஒப்புதல்

நடப்புக் கூட்டத் தொடரில் தாக்கலாகிறது

'ஒரே நாடு ஒரே தேர்தல்' திட்டத்துக்கான வரைவு மசோதா மற்றும் அத்திட்டத்தை நடைமுறைப்படுத்துவதற்காக அரசமைப்புச் சட்டத்தில் திருத்தம் மேற்கொள்வதற்கான சட்டத் திருத்த மசோதாக்களுக்கு மத்திய அமைச்சரவை வியாழக்கிழமை ஒப்புதல் அளித்தது.

இந்த இரு மசோதாக்களும் நடப்பு நாடாளுமன்ற குளிர்காலக் கூட்டத் தொடரிலேயே அறிமுகப்படுத்தப்பட வாய்ப்புள்ளதாக ஆளுங்கட்சி வட்டாரங்கள் தெரிவித்தன.

மத்திய அரசு முன்மொழிந்த ஒரே நாடு ஒரே தேர்தல் திட்டத்தின் சாத்தியக்கூறுகள் குறித்து ஆராய முன்னாள் குடியரசுத் தலைவர் ராம்நாத் கோவிந்த் தலைமையில் உயர்நிலைக் குழு அமைக்கப்பட்டது. இந்தக் குழு பல்வேறு தரப்பினரிடமிருந்து கருத்துகளைப் பெற்று, அதன் அடிப்படையில் கடந்த மார்ச் மாதம் தனது அறிக்கையை மத்திய அரசிடம் சமர்ப்பித்தது.

பரிந்துரைகள்: மக்களவைக் கும், சட்டப்பேரவைகளுக்கும் ஒரே நேரத்தில் தேர்தலை நடத்த சாத்தியமுள்ளது. அதற்கேற்ப சட்டத்தில் திருத்தங்கள் கொண்டுவரப்பட வேண்டும். முதலாவதாக மக்களவை, சட்டப் பேரவைகளுக்கான தேர்தலையும், அதைத் தொடர்ந்து 100 நாட்களுக்குள் உள்ளாட்சித் தேர்தலையும் நடத்தலாம். தொங்கு மக்களவை ஏற்பட்டாலோ, அரசுக்கு எதிரான நம்பிக்கையில்லாத் தீர்மானம் வெற்றி பெற்றாலோ மீதமுள்ள மக்களவையின் பதவிக் காலத்துக்கு புதிய தேர்தலை நடத்தலாம்.