കട്ടൻ ചായയും പരിപ്പുവടയും

ഉപതിരഞ്ഞെടുപ്പിൽ ചർച്ചയാക്കി ഇ പിയുടെ ആത്മകഥ പ്രസാധകർക്ക് വക്കീൽ നോട്ടീസ്, ഡിജിപിക്ക് ഇ. പിയുടെ പരാതി

- ബി.വി. അരുൺ കുമാർ

തിരുവനന്തപുരം: വോട്ടെടുപ്പ് ദിനത്തിൽ ഉയർന്ന വിവാദത്തിൽ ഉലഞ്ഞ് വീണ്ടും ഇടത് മുന്നണി. വയനാട്, ചേലക്കര ഉപതിരഞ്ഞെടുപ്പ് ദിവസം തന്നെ ഇ.പി. ജയരാജന്റേതെന്ന തരത്തിൽ പുറത്തുവന്ന ആത്മകഥ ഇടത് മുന്നണിയെ ഞെട്ടിച്ചു. തുടർച്ചയായി രണ്ടാം തവണയാണ് തിരഞ്ഞെടുപ്പ് ദിനങ്ങളിൽ ഇ.പി ശ്രദ്ധാകേന്ദ്രമായി മാറുന്നത്. കഴിഞ്ഞ ലോക്സഭാ തിരഞ്ഞെടുപ്പിന് മണിക്കൂറുകൾ മാത്രം ബാക്കി നിൽക്കെയായിരുന്നു ഇ.പി. ജയരാജനും ബിജെപി നേതാവ് പ്രകാശ് ജാവദേക്കറുമായുള്ള കൂടിക്കാഴ്ച വിവരം പുറത്തുവന്നത്. എന്നാൽ ഈ ഉപതിരഞ്ഞെടുപ്പ് സമയം കട്ടൻ ചായയും പരിപ്പുവടയും എന്ന് പേരിട്ട ആത്മകഥയെന്ന രീതിയിലായിരുന്നു പ്രസാധകരുടെ ഭാഗത്ത് നിന്നും ഫേസ്ബുക്ക് പോസ്റ്റുവഴി പുറത്തുവന്നത്.