જમ્મુ અને કાશ્મીરમાં અનામત નીતિ સામે વિરોધ ઉગ્ર બન્યો

મુખ્યમંત્રી ઓમર અબ્દુલ્લાનો પુત્ર પણ વિરોધમાં જોડાયો । રાજકીય આગેવાનો અને વિધાર્થીઓમાં રોષનું કારણ બની હતી

પછાત વર્ગ આયોગની ભલામણોના આધારે અન્ય પછાત વર્ગોને ૮ ટકા અનામત આપવામાં આવી હતી અને ૧૫ નવી જાતિઓને ઓબીસી સૂચિમાં ઉમેરવામાં આવી હતી

જમ્મુ-કાશ્મીરમાં અનામત નીતિને લઈને વિરોધ ઉગ્ર બન્યો છે. સેંકડો વિદ્યાર્થીઓ અને અનેક રાજકીય નેતાઓ મુખ્યમંત્રી ઓમર અબ્દુલ્લા ના ઘરની બહાર એકઠા થયા હતા અને રાજ્ય સરકાર પાસેથી અનામત નીતિની સમીક્ષાની માંગ કરી હતી. આ નીતિ આ વર્ષની શરૂઆતમાં લેફ્ટનન્ટ ગવર્નર મનોજ સિંહાની આગેવાની હેઠળના વહીવટીતંત્ર દ્વારા લાગુ કરવામાં આવી હતી.નેશનલ કોંગ્રેસના સભ્ય અને સાંસદ રૂહુલ્લા મેહદી પણ વિરોધમાં જોડાયા હતા. તેમણે આ વિરોધને ટેકો આપ્યો હતો અને સોશિયલ મીડિયા હેન્ડલ ‘એકસ' પરની એક પોસ્ટમાં, તેમણે અનામત નીતિમાં તર્કસંગતતાની માંગ સાથે ગુપકર રોડ સ્થિત મુખ્યમંત્રી કાર્યાલયની બહાર વિરોધ કરવાની અપીલ કરી હતી. આ સાથે પીડીપી નેતા વાહીદ પારા, ઇલ્વિજા મુફ્તી અને અવામી એકતા પાર્ટીના નેતા શેખ ખુરાશી (એન્જિનિયર રાશિદના ભાઈ) પણ વિરોધમાં જોડાયા હતા.