தமிழக சட்டசபையில் டங்ஸ்டன் சுரங்கத்திற்கு எதிரான தனித் தீர்மானம் நிறைவேற்றம்

தமிழக சட்டசபையில் துறை வாரியாக மானிய கோரிக்கைகள் மீதான விவாதம் கடந்த ஜூன் 20 முதல் 29ம் தேதி வரை 10 நாட்கள் நடத்தப்பட்டது.

பேரவை விதிகளின்படி, ஒரு கூட்டம் முடிந்தால், அடுத்த 6 மாதங்களில் அடுத்த கூட்டம் நடத்த வேண்டும். அந்த வகையில், இம்மாத இறுதிக்குள் சட்டசபை கூட்டம் நடத்தப்பட வேண்டும்.

இந்நிலையில், தமிழக சட்டசபை இன்று கூடும் என்று பேரவை தலைவர் அப்பாவு கடந்த நவம்பர் 25ம் தேதி அறிவித்திருந்தார். கடந்த 2ம் தேதி நடந்த அலுவல் ஆய்வு குழு கூட்டத்தில், சட்டசபை கூட்டத்தை டிசம்பர் 9, 10ம் தேதிகள் (இன்றும், நாளையும்) என 2 நாட்கள் நடத்துவது என முடிவெடுத்து அறிவிக்கப்பட்டது.

சட்டமன்றத்தில் டங்ஸ்டன் சுரங்கத்துக்கு எதிரான தனித் தீர்மானம் மீது எடப்பாடி பழனிசாமி உரையாற்றினார்.

அப்போது பேசிய அவர், "மாநில உரிமைகள் பறிபோகும்போதே நாடாளுமன்றத்தில் தி.மு.க. எம்.பி.க்கள் மத்திய அரசுக்கு ஏன் உரிய அழுத்தம் தரவில்லை..? தமிழக அரசு, மத்திய அரசுக்கு வலியுறுத்தவில்லை என சுரங்க அமைச்சகம் கூறியுள்ளது.

சுரங்கம் தொடர்பாக பிரமருக்கு எழுதிய கடிதத்தின் விவரங்களை தீர்மானத்தில் தெரிவிக்கப்படவில்லை. மக்கள் ஆர்ப்பாட்டம் செய்த பின்னரே டங்ஸ்டன் சுரங்கத்திற்கு மாநில அரசு எதிர்ப்பு தெரிவித்தது.

டங்ஸ்டன் சுரங்க விவகாரத்தில் 10 மாதமாக தி.மு.க. அரசு எதிர்ப்பு தெரிவிக்கவில்லை.

என்ன செய்து கொண்டிருக்கின்றீர்கள்?" என்று தெரிவித்தார்.

அவர் இதனிடையே டங்ஸ்டனுக்கு ஏற்கனவே எதிர்ப்பை பதிவு செய்தோம் என்று அமைச்சர் தங்கம் தென்னரசு விளக்கம் தெரிவித்தார்.

தொடர்ந்து எதிர்க்கட்சித் தலைவர் எடப்பாடி பழனிசாமி கேட்ட கேள்விக்கு அவை முன்னவர் துரை முருகன் பதிலளித்து வருகிறார். தற்போது இதுதொடர்பாக காரசார விவாதம் நடைபெற்று வருகிறது.

டங்ஸ்டன் கனிம சுரங்க உரிமையை ரத்து செய்ய வலியுறுத்தி சட்டசபையில் தனித் தீர்மானம் கொண்டுவரப்பட்டது.