નેશનલ હેરાલ્ડની ઓફિસ સહિત 12 સ્થળે ઇડીના દરોડા

સોનિયા, રાહુલની પૂછપરછ બાદ ઇડીની કાર્યવાહીથી કોંગ્રેસની મુશ્કેલી વધી: કોંગ્રેસે દેખાવો કરી વિરોધ નોંધાવ્યો

એન્ફોર્સમેન્ટ ડિરેક્ટોરેટ (ઇડી)એ મંગળવારે કોંગ્રેસ પાર્ટીની માલિકીના નેશનલ હેરાલ્ડ અખબારના વડામથક અને અન્ય ૧૧ સ્થળોએ દરોડા પાડ્યા હતા. હાલમાં ચાલી રહેલા મની લોન્ડરિંગ તપાસના ભાગરૂપે દરોડા પાડવામાં આવ્યા હતા. આ તમામ સર્ચ પ્રિવેન્શન ઓફ મની લોન્ડરિંગ એક્ટ (પીએમએલએ)ની ગુનાઇત કલમો હેઠળ સર્ચ કામગીરી હાથ ધરાઇ હતી. જેમાં પૈસાનું મૂળ શોધવા વધારાના પૂરાવા એકત્ર કરવા તેમજ નેશનલ હેરાલ્ડ સંબંધિત વ્યવહારોમાં સામેલ કંપનીઓ સામે આ પગલું ભરવામાં આવી રહ્યું છે.

ઉલ્લેખનીય છે કે આ કેસમાં ઇડીએ કોંગ્રેસ પ્રમુખ સોનિયા ગાંધી અને રાહુલ ગાંધીની પણ પૂછપરછ કરી હતી. એ પછી હવે તેણે પાડેલા દરોડાથી ખળભળાટ વ્યાપી ગયો છે. કોંગ્રેસનો આરોપ હતો કે ચૂંટણીમાં રાજકીય લાભ મેળવવા અને વિપક્ષી દળોના નેતાઓને પરેશાન કરવા માટે નરેન્દ્ર મોદી સરકાર ઇડીનો ઉપયોગ કરી રહી છે.