મોરબી દુર્ઘટનાના શોક પ્રસ્તાવમાં ભાજપને ઝાટકવાની તક વિપક્ષ કોંગ્રેસે ગુમાવી

» અમદાવાદ મ્યુનિ.બોર્ડમાં મોરબીની દુર્ઘટનામાં કેટલા મરણ થયાં તેનો પણ ઉલ્લેખ નહીં, બે લીટીમાં ખેદ સંવેદના વ્યક્ત કરી દેવાઇ

ગુજરાત સહિત દેશભરમાં ચકચાર જગવનારા મોરબી ઝુલતા પુલ તૂટી પડવાની દુર્ઘટના અંગે મ્યુનિ. બોર્ડમાં શોક પ્રસ્તાવને લઇ શાસક ભાજપ ઉપર આકરા પ્રહારો કરવાની તક મ્યુનિ. કોંગ્રેસે ગુમાવી હતી અને ભાજપ તરફથી રજૂ કરાયેલા શોક પ્રસ્તાવને કોઇ જ ટીકાટિપ્પણી વગર સરળતાથી સમર્થન આપી દીધું હતું.

ગુજરાત વિધાનસભા ચૂંટણીની આચારસંહિતા અમલી બની ગઇ છે, પરંતુ નિયમ મુજબ મ્યુનિ. સામાન્ય સભાની બેઠક બોલાવવામાં આવી હતી, જેમાં ઝીરો અવર રદ કરીને મોરબી દુર્ઘટના અને અન્ય પૂર્વ સભ્યોનાં નિધન અંગે શોક પ્રસ્તાવ મેયર કિરીટભાઇ પરમાર દ્વારા રજૂ કરવામાં આવ્યા હતા.