പോപുലർ ഫ്രണ്ട് ഹർത്താൽ സ്വത്ത് കണ്ടുകെട്ടൽ തുടങ്ങി

 സംസ്ഥാനത്തെ ആദ്യ നടപടി വിവിധ ജില്ലകളിൽ ജപ്തി

തിരുവനന്തപുരം: നിരോധിത സംഘടന പോപുലർ ഫ്രണ്ടിന്റെ ഹർത്താലിലുണ്ടായ അക്രമസംഭവങ്ങളുമായി ബന്ധപ്പെട്ട് സംഘടനയുടെയും പ്രധാനഭാരവാഹികളുടെയും സ്വത്തുക്കൾ ജപ്തി ചെയ്യുന്ന നടപടി ആരംഭിച്ചു. ഹൈകോടതിയുടെ കർശനനിർദേശത്തിന്റെ അടിസ്ഥാനത്തിൽ വെള്ളിയാഴ്ച ഉച്ചക്ക് ശേഷമാണ് കലക്ടർമാരുടെ നേതൃത്വത്തിൽ നടപടി തുടങ്ങിയത്.

ശനിയാഴ്ച വൈകീട്ട് അഞ്ചിനകം നടപടി പൂർത്തീകരിക്കാനാണ് റവന്യൂ വകുപ്പിന്റെ നിർദേശം. ഹർത്താൽ അക്രമത്തിന്റെ പേരിൽ സംസ്ഥാനത്ത് ആദ്യമായാണ് ഒരു സംഘടനയുടെയും ഭാരവാഹികളുടെയും സ്വത്തുക്കൾ കൂട്ടത്തോടെ കണ്ടുകെട്ടുന്നത്. മുൻകൂർ നോട്ടീസ് നൽകാതെ ഹർത്താൽ നടത്തരുതെന്ന ഉത്തരവ് ലംഘിച്ചുവെന്ന് ചൂണ്ടിക്കാട്ടിയാണ് ഹൈകോടതി നടപടി.