പ്രത്യാക്രമണം ആസന്നമെന്ന് ഇസ്രായേൽ യുദ്ധം പടരുന്നു

ലബനാൻ അതിർത്തിയിൽ നേർക്കുനേർ ഏറ്റുമുട്ടൽ തുടരുന്നതായി ഹിസ്ബുല്ല എട്ട് ഇസ്രായേൽ സൈനികർ കൊല്ലപ്പെട്ടു; 18 പേർക്ക് പരിക്ക് കോപൻഹേഗനിലെ ഇസ്രായേൽ എംബസിക്കു സമീപം സ്ഫോടനം ആക്രമണം അവസാനിപ്പിച്ചില്ലെങ്കിൽ പ്രത്യാഘാതം ഗുരുതരമെന്ന് ഇറാൻ

ബൈറൂത്: ഇസ്രായേലിലെ ഇറാൻ മിസൈലാക്രമണത്തിന് പിന്നാലെ പശ്ചിമേഷ്യയിൽ ഗസ്സയും ലബനാനും യമനും കടന്ന് യുദ്ധം പടരുകയാണെന്ന ആശങ്കക്ക് കനംവെക്കുന്നു. പ്രധാനമന്ത്രി നെതന്യാഹു പ്രതികാരം പ്രഖ്യാപിക്കുകയും കൂടുതൽ സൈനികരെ അടിയന്തരമായി മേഖലയിൽ വിന്യസിക്കുകയാണെന്ന് യു.എസ് അറിയിക്കുകയും ചെയ്തതോടെയാണ് മേഖല കൂടുതൽ രക്തരൂഷിതമാകുമെന്ന ആശങ്ക ശക്തമായത്.

പശ്ചിമേഷ്യയിലെ പാശ്ചാത്യ ശക്തികൾ പൂർണമായി തിരിച്ചു പോകണമെന്നും സയണിസ്റ്റ് ശക്തി കുറ്റകൃത്യങ്ങൾ അവസാനി പ്പിച്ചില്ലെങ്കിൽ പ്രത്യാഘാതം ഗുരുതരമാകുമെന്നും ഇറാനും മുന്നറിയിപ്പ് നൽകിയിട്ടുണ്ട്. യുദ്ധസാധ്യത കണക്കിലെടുത്ത് ഇറാൻ വിടാൻ വിവിധ രാജ്യങ്ങൾ സ്വന്തം പൗരന്മാർക്ക് മുന്നറിയിപ്പ് നൽകി. അതിനിടെ, കോപൻഹേഗനിലെ ഇസ്രായേൽ എംബസിക്കു സമീപം സ്ഫോടനം നടന്നു. ആളപായമില്ല. എംബസിക്കും കേടുപാടുകളില്ല. മൂന്നുപേരെ അറസ്റ്റ് ചെയ്തു.