மணிப்பூரில் தலைவிரித்தாடும் வன்முறை: தலைநகர் இம்பாலில் ராணுவம் குவிப்பு!

இரவு முழுவதும் நடந்த தொடர் கலவரத்தில் 13 எம்.எல்.ஏ.க்களின் வீடுகள் சூறை – எரிப்பு!! -

சாக்கு மூட்டையில் கட்டப்பட்ட தாய், மகள் உடல்கள் ஆற்றில் கண்டெடுக்கப்பட்டன. இதையடுத்து மணிப்பூரில் இரவு முழுவதும் வன்முறை தாண்டவமாடியது. 13 எம்.எல்.ஏ.க்களின் வீடுகள் சூறையாடப்பட்டன. சில வீடுகள் தீவைத்து எரிக்கப்பட்டன. இதையடுத்து தலைநகர் இம்பாலில் ராணுவம் குவிக்கப்பட்டுள்ளது.

வடகிழக்கு மாநிலங்களில் ஒன்றான மணிப்பூரில் மெய்தி மற்றும் குக்கி இன மக்கள் வசித்து வருகின்றார்கள். இவர்களில் மெய்தி இன மக்கள் பெரும்பான்மையாக உள்ளார்கள். குக்கி இன மக்கள் ஓரளவு சிறுபான்மையினராக உள்ளார்கள்.

அங்கு வசிக்கும் மெய்தி இன மக்களுக்கும், பழங்குடியினர் இன அந்தஸ்து வழங்க ஏற்பாடு செய்யப்பட்டது. இதற்கு குக்கி இன மக்கள் எதிர்ப்பு தெரிவித்தனர். இதனால் வன்முறை வெடித்தது.

இந்தக் கலவரம் கடந்த ஆண்டு மே மாதம் தொடங்கியது. இரு தரப்பிலும் ஏராளமான மக்கள் கொல்லப்பட்டனர். கற்பழிப்பு, கொள்ளை, தீவைப்பு போன்ற சம்பவங்கள் அரங்கேறின.

அப்போதே அமைச்சர்களின் வீடுகள், எம்.எல்.ஏ.க்களின் வீடுகள் தாக்கப்பட்டன.

அங்கு மத்திய ரிசர்வ் போலீஸ் படையினர் அதிக அளவில் குவிக்கப்பட்டார்கள். இருந்தாலும் வன்முறை தொடர்ந்து நடந்தது. சில மாதங்கள் கழித்து ஓரளவு அடங்கியது. இருந்தாலும் அவ்வப்போது தொடர்ந்து வன்முறைச் சம்பவங்கள் நடந்து கொண்டே இருந்தன.