சாம்பியன் டிராபி கிரிக்கெட்: இந்தியா மோதும் ஆட்டங்கள் வேறு நாட்டில் நடத்தப்படுமா?

பாகிஸ்தானை சம்மதிக்க வைக்க ஐ.சி.சி தீவிர முயற்சி!!

சர்வதேச கிரிக்கெட் கவுன்சில் (ஐ.சி.சி.) நடத்தும் தொடர்களில் 'மினி உலகக் கோப்பை' என்று அழைக்கப்படுவது சாம்பியன்ஸ் டிராபி போட்டித் தொடராகும்.

1998 முதல் நடத்தப்பட்டு வரும் சாம்பியன்ஸ் டிராபி தொடரில் இந்தியா, ஆஸ்திரேலியா அணிகள் தலா இரு முறை கோப்பையை வென்றுள்ளது.

கடைசியாக, 2017ல் நடந்த தொடரில் விராட் கோலி தலைமையிலான அணி இறுதிப் போட்டிக்கு முன்னேறிய போதும், பாகிஸ்தானிடம் அதிர்ச்சித் தோல்வி அடைந்து 3ஆவது முறையாக கோப்பையை வெல்லும் வாய்ப்பை இழந்தது.

இந்நிலையில் அடுத்த சாம்பியன்ஸ் டிராபி தொடர், பாகிஸ்தானில் அடுத்தாண்டு பிப்ரவரியில் நடத்த திட்டமிட்டுள்ளது.

எனினும், போட்டிக்கான அட்டவணை இதுவரை வெளியிடப்படாமல் உள்ளது.

இதற்கு முக்கியக் காரணம், அரசியல் சூழல், பாதுகாப்பு காரணங்களால் இந்திய கிரிக்கெட் அணி, பாகிஸ்தானுக்கு சென்று விளையாடாது என்று இந்திய கிரிக்கெட் வாரியம் (பி.சி.சி.ஐ) திட்டவட்டமாகக் கூறியுள்ளது.

கடந்த 2008ஆம் ஆண்டு முதல் பாதுகாப்பு காரணங்களால் இந்திய அணி பாகிஸ்தானுக்கு செல்லவில்லை.

2012-13ல் கடைசியாக பாகிஸ்தான் அணி, இந்தியாவுக்கு வந்து இருதரப்பு போட்டிகளில் விளையாடியது.