இந்தியாவிலேயே பெண்களுக்குப் பாதுகாப்பு அளிப்பதில் தமிழகம் முன்னிலை வகிக்கிறது!

பெண்களுக்கு பாதுகாப்பு அளிப்பதில் தமிழ்நாடு முன்னிலை வகிக்கிறது என நடிகர் விஜய்க்கு அமைச்சர் கீதா ஜீவன் பதிலடி கொடுத்துள்ளார்.

சர்வதேச பெண்களுக்கு எதிரான வன்முறை ஒழிப்பு தினத்தையொட்டி தமிழக வெற்றிக் கழகத் தலைவர் விஜய் ஒரு அறிக்கை வெளியிட்டிருந்தார்.

அதில் பெண் விடுதலை பேசும் தமிழகத்தில் பெண்கள், குழந்தைகளுக்கான பாலியல் குற்றங்கள் அதிகரித்து இருப்பதாக கூறியிருந்தார்.

அதற்கு பதிலடி கொடுக்கும் வகையில் அமைச்சர் கீதா ஜீவன் ஒரு அறிக்கை வெளியிட்டுள்ளார். அதில் கூறியிருப்பதாவது:

பெண்களுக்கான உரிமைகளை காப்பது போலவே அவர்களது கண்ணியத்தையும், பாதுகாப்பையும் உறுதி செய்வதில் முதலமைச்சர் மு.க.ஸ்டாலின் தலைமையிலான திராவிட மாடல் அரசு உறுதியாக இருக்கிறது.

பெண்கள் சுதந்திரமாகவும், பாதுகாப்பாகவும் தங்களுடைய பணிகளை மேற்கொள்வதற்கான சூழல் தமிழ்நாட்டில் நிலவுவதால் தான் தமிழ்நாட்டில் பெண்கள் மிக அதிக அளவில் கல்வி கற்கிறவர்களாக, வேலைக்குச் செல்பவர்களாகவும், சுயமானவர்களாகவும் இருக்கிறார்கள். இந்தியாவில் உற்பத்தித் துறையில் உள்ள பெண்களில் கிட்டத்தட்ட பாதிப் பேர், அதாவது 43 சதவீதம் பேர் தமிழ்நாட்டில் பணியாற்றுகிறார்கள்.