70 വയസു കഴിഞ്ഞ എല്ലാവർക്കും ആരോഗ്യ പരിരക്ഷയുമായി കേന്ദ്രസർക്കാർ

എല്ലാ വരുമാനകാർക്കും 5 ലക്ഷത്തിന്റെ സൗജന്യ ഇൻഷുറൻസ്

ന്യൂഡൽഹി: അഭിമാന പദ്ധതിയായ ആയുഷ്മാൻ ഭാരത് പ്രധാൻ മന്ത്രി ജൻ ആരോഗ്യ യോജന (എ.ബി പി.എം.ജെ.എ.വൈ) കീഴിൽ 70 വയസും അതിൽ കൂടുതലുമുള്ള എല്ലാ പൗരന്മാർക്കും വരുമാനം പരിഗണിക്കാതെ ആരോഗ്യ പരിരക്ഷ നല്കുന്നതിന് പ്രധാനമന്ത്രി നരേന്ദ്ര മോദിയുടെ അദ്ധ്യക്ഷതയിൽ ചേർന്ന കേന്ദ മന്ത്രിസഭായോഗം അംഗീകാരം നൽകി.

ആറ് (6) കോടി മുതിർന്ന പൗരന്മാരുള്ള ഏകദേശം 4.5 കോടി കുടുംബങ്ങൾക്ക് കുടുംബാടിസ്ഥാനത്തിൽ 5 ലക്ഷം രൂപയുടെ സൗജന്യ ആരോഗ്യ ഇൻഷുറൻസ് പരിരക്ഷയാണ് ഇത് ലക്ഷ്യമിടുന്നത്.

ഈ അംഗീകാരത്തോടെ, 70 വയസും അതിൽ കൂടുതലുമുള്ള എല്ലാ മുതിർന്ന പൗരന്മാർക്കും അവരുടെ സാമൂഹിക സാമ്പത്തിക നില പരിഗണിക്കാതെ തന്നെ എ.ബിപി.എം.ജെ.എ.യുടെ ആനുകൂല്യങ്ങൾ ലഭിക്കാൻ അർഹതയുണ്ടാകും.

യോഗ്യരായ മുതിർന്ന പൗരന്മാർക്ക് എ.ബിപി.എം.ജെ.എ.വൈക്ക് കീഴിലുള്ള ഒരു പുതിയ വ്യതിരിക്തമായ കാർഡ് നൽകും. എ.ബി പി.എം.ജെ.എ.വൈക്ക് കീഴിൽ ഇതിനകം ഉൾപ്പെട്ട കുടുംബങ്ങളിലെ 70 വയസും അതിൽ കൂടുതലുമുള്ള മുതിർന്ന പൗരന്മാർക്ക് പ്രതിവർഷം 5 ലക്ഷം രൂപ വരെ അധിക ടോപ്പ് അപ്പ് പരിരക്ഷ ലഭിക്കും.