શહેરના ૧૨ ગાર્ડનમાં ૫૦ ટકા રાહત દરે મેડિકલ ટેસ્ટની સુવિધા

દર શનિવારે સવારે છથી સાડા આઠ વાગ્યા સુધી આ સુવિધા લોકોને અપાશે

અમદાવાદ, મંગળવાર

મ્યુનિસિપલ કોર્પોરેશન સંચાલિત સરદાર વલ્લભભાઈ પટેલ ઇન્સ્ટિટ્યૂટ ઓફ મેડિકલ સાયન્સ એન્ડ રિસર્ચ એટલે કે એસવીપી હોસ્પિટલ ખાતે અદ્યતન લેબોરેટરી તથા આધુનિક સાધનો વસાવવામાં આવ્યાં છે. આ લેબોરેટરીમાં પૂર્ણ કક્ષાએ ઉપયોગ થાય અને જાહેર જનતાને તેનો લાભ મળે તે હેતુથી ગત તા. ૮ જુલાઈના રોજથી દર શનિવારે ૫૦ ટકા ડિસ્કાઉન્ટથી મેડિકલ ટેસ્ટ કરવામાં આવી રહ્યા છે. હવે લોકોની સુવિધા માટે તા. ૨૯ જુલાઈથી છેક તા. ૩૧ માર્ચ-૨૦૨૪ સુધી શહેરના કાંકરિયા લેકફ્રન્ટ, પ્રહ્લાદનગર ગાર્ડન સહિતના કુલ ૧૨ ગાર્ડન ખાતે ૫૦ ટકા રાહત દરે મેડિકલ ટેસ્ટ કરવામાં આવશે.