நினைவில் நித்தம் நிலைத்திருக்கும் 'எஃப்இஜி' பாலா

சிங்கப்பூரிலும் உலகெங்கிலும் ஊடக, திரைப்பட, பழங்கால கார் துறைகளில் முக்கியப் பங்காற்றிய ஏ எல் பாலா பானு, கடந்த ஜூலை 21ஆம் தேதி தமது 71வது வயதில் உடல்நலக் குறைவால் காலமானார்.

- ரவி சிங்காரம்

1953ஆம் ஆண்டு ஜனவரி 31ஆம் தேதி பிறந்தவர் ‘எஃப்இஜி’ பாலா. இவரது பெயரைச் சொன்னாலே பலருக்கும் அன்பான, தாராள மனம் படைத்த பாலா என்றுதான் நினைவுக்கு வரும்.

தம் சகோதரர்கள் ஏ எல் காணா, ஏ எல் தக்‌ஷியுடன் ‘எஃப்இஜி’ (Film Equipment Gallery) நிறுவனத்தை 1990களில் இருந்து நடத்திவந்த அவர், சிங்கப்பூரில் நடந்த பல படப்பிடிப்புகளுக்குக் கருவிகளை வழங்கினார்.

தம் சீரான பணிகளால் சிங்கப்பூரில் மட்டுமன்றி ஆஸ்திரேலியா, இந்தியா, ஜப்பான், சீனா, ஐரோப்பா, ஹாலிவுட் வரை இம்மூன்று சகோதரர்களின் பெயரும் பரவிவிட்டது.

110, 112, 114 சோஃபியா சாலையில் இரண்டு மாடி ‘பெரானாக்கான்’ கடைவீடுகளில் அலுவலகம் வைத்திருந்த பாலாவையும் குழுவினரையும் தேடி பன்னாட்டுத் திரைப்பட, தொலைக்காட்சிக் குழுவினரும் வந்தனர்.

“பாலா பேசும் முறையிலேயே ஒரு கவர்ச்சி இருந்தது. உடையில், நடையில் அக்காலத்திலிருந்தே அவர் நவீனமயமாக இருந்தார்.

“குறிப்பாக, அவர் தொழிலாளர்களைப் பார்த்தாலும் கோடீஸ்வரரைப் பார்த்தாலும் வித்தியாசம் பார்க்காமல் பழகுவார். அதனால் அவருக்கு நிறைய நண்பர்கள் இருந்தனர். ஓர் அண்ணனாகவும் மிகுந்த புரிந்துணர்வுடன் இருந்தார்,” என நினைவுகூர்ந்தார் அவருடைய இரண்டாவது தம்பி ஏ எல் காணா, 62.

“அவர் சிறுவயதிலிருந்து எங்கள் இருவரையும் நன்கு பார்த்துக்கொள்வார். திரைப்படங்களுக்கு அழைத்துச் செல்வார். அவரால் பலரும் முன்னுக்கு வந்துள்ளனர்,” என்றார் அவருடைய முதல் தம்பி ஏ எல் தக்‌ஷி, 64.