తేనెలొలికే 'తెలింగి' ఎక్కడుంది?'

తమిళ మహాకవి సుబ్రహ్మణ్యభారతి, తన ' జాతీయ ఐక్యతా గీతంలో 'సుందర తెలింగి' అని తేనెలొలికే మన తల్లి పలుకుబడిని ప్రస్తావించారు

- జయసూర్య

తమిళ మహాకవి సుబ్రహ్మణ్యభారతి, తన ' జాతీయ ఐక్యతా గీతంలో 'సుందర తెలింగి' అని తేనెలొలికే మన తల్లి పలుకుబడిని ప్రస్తావించారు. తమిళ సంస్కృతి, భాషా వికాసంలో తెలుగు అంతర్భాగం. సేవప్ప, అచ్యుతప్ప వంటి నాయక రాజుల కాలంనాటి 1500 తెలుగు తాళపత్ర సంపుటిలు, నేటికీ తంజావూర్ సరస్వతీ మహల్ గ్రంథాలయంలో పదిలంగా భద్రపరచబడి వున్నాయి.

స్వాతంత్ర్యానంతరం దేశీయ భాషలుగా తల్లి పలుకుబడికి ప్రాధాన్యం పెరిగింది. కానీ జాతీయ స్థాయిలో హిందీ, అంతర్జాతీయ స్థాయిలో ఆంగ్లం దేశ, కాలమాన పరిస్థితులకు అనుగుణంగా అందలం ఎక్కాయి.త్రిభాషా సూత్రం ప్రవేశించింది.రాజభాషగా హిందీకి పట్టాభిషేకం చేయాలనే ప్రయత్నాలు బాహాటంగా కొన్ని, గుట్టుచప్పుడు కాకుండా కొంత నడుస్తూనే వున్నాయి. విద్యా, ఉద్యోగ, ఉపాధి అవకాశాల కోసం యువత, ఆంగ్లాన్ని దైనందిన వ్యవహారాల నిర్వహణ వెసులుబాటు కోసం ఉత్తరాది భాషగా హిందీని అనుసరించక తప్పటం లేదు.

ప్రపంచ వ్యాప్తంగా లక్షలాదిగా స్వదేశీయులు ఇంచుమించు అన్ని రాష్ట్రాల నుంచి భారీ వలసలు 21వ శతాబ్దంలో మరింత పెరుగుతున్నాయి.హిందీ తర్వాత అధిక సంఖ్యాకుల భాషగా వ్యవహరించబడే రెండవ స్వదేశీ భాష ప్రస్తుతం ఎక్కడుంది? అనే ప్రశ్న తల ఎత్తుతోంది.