ദീപവും ആവലിയും ചേർന്ന വിജയോത്സവം

ലോകജനസമക്ഷത്തിന്റെ ആചാരാനുഷ്ഠാനങ്ങൾ അലിഞ്ഞുചേർന്ന ആഘോഷമാണ് ദീപാവലി. ഇത് വിജയത്തിന്റെ ഉത്സവമാണ്. ശ്രീകൃഷ്ണ ഭഗവാൻ നരകാസുരനെ വധിച്ച് ജനങ്ങളെ രക്ഷിച്ച പുണ്യദിനം. ദീപം, ആവലി എന്നീപദങ്ങൾ ചേർന്നാണ് ദീപാവലി എന്ന പദം ഉത്ഭവിച്ചത്. ഇത് ലോപിച്ച് ദീപാളിയുമായി തീർന്നു. ശ്രീരാമൻ പതിന്നാല് വർഷത്തെ വനവാസത്തിന് ശേഷം അയോദ്ധ്യയിൽ തിരിച്ചെത്തിയതിനെ പ്രതിനിധീകരിച്ചാണ് ഈ ആഘോഷം നടത്തുന്നത്. ഈ ഉത്സവം ജൈനവിശ്വാസപ്രകാരം മഹാവീരൻ നിർവാണം പ്രാപിച്ചതിനേയും അനുസ്മരിക്കുന്നു.

- സുരേഷ് അന്നമനട (8157805008)

ആത്മീയചൈതന്യത്തിന്റെ അലൗകികവും അനന്യവുമായ അന്തരീക്ഷത്തിൽ ആഘോഷിക്കുന്ന ദീപാവലി ഭക്തിസാന്ദ്രമായ പ്രകാശത്തിന്റെ ഉത്സവമാണ്. സർവൈശ്വര്യങ്ങളുടേയും സവിശേഷതകളുടേയും സാക്ഷ്യവും സമന്വയവുമായ സർഗാനുഭൂതിയുടെ ദീപോത്സവമാണ്. ഭാരതത്തിലെ കുടിലുകൾതൊട്ട് കൊട്ടാരങ്ങൾ വരെ അത്യാനന്ദപൂർവ്വം ദീപാവലി ആഘോഷിക്കപ്പെടുന്നു. ആകാശത്തിലെ നക്ഷത്രങ്ങളെപ്പോലെ അസംഖ്യം ദീപങ്ങൾ ഭാരതമാകെ തെളിഞ്ഞു നിൽക്കുന്നത് കണ്ണിനും മനസ്സിനും ഒരു പോലെ സുഖം നൽകുന്നു. എത്ര ശൂന്യമായ ഹൃദയത്തിനും സന്തോഷം പകരുവാൻ ദീപങ്ങളുടെ ഉത്സവത്തിനു കഴിയുന്നു. ദീപങ്ങളേപ്പോലെ ലോകത്തിനു പ്രകാശമായിത്തീരുവാനുള്ള സന്ദേശമാണ് ദീപാവലി നമുക്ക് പകർന്നു തരുന്നത്. തിന്മയുടെ ഇരുളിനെ അകറ്റി നന്മയുടെ തിരി തെളിയിക്കുവാൻ ദീപാവലി നമ്മെ ഉദ്ബോധിപ്പിക്കുന്നു.

വെളിച്ചത്തിന്റെ ഈ ഉത്സവത്തെ വരവേൽക്കുവാനുള്ള ഒരുക്കങ്ങൾ ദിവസങ്ങൾക്കു മുമ്പു തന്നെ ഭാരതീയർ ആരംഭിക്കുന്നു. ഈ അവസരത്തിൽ ഭാരതം അനേകം തിരികൾ തെളിയുന്ന ഒരൊറ്റ വിളക്കായിത്തീരുകയാണ് ചെയ്യുന്നത്.

വിശാലമായ ഭാരതത്തിന്റെ വിവിധ ഭാഗങ്ങളിൽ വിവിധങ്ങളായ കഥകളാണ് ഇതു സംബന്ധമായി നിലനിൽക്കുന്നത്. വിഷ്ണുഭഗവാന്റെ അർദ്ധാംഗിനിയായ ലക്ഷ്മിദേവിയുടെ സ്മരണയ്ക്കായാണ് ദീപാവലി കൊണ്ടാടപ്പെടുന്നത് എന്ന് പൊതുവെ അംഗീകരിക്കപ്പെടുന്നു. ഭാരതമെപാടും ഈ അവസരത്തിൽ ലക്ഷ്മീദേവിക്ക് പൂജകൾ അർപ്പിക്കപ്പെടുന്നു. വ്യാപാരികളും വ്യവസായികളും ധനത്തിന്റെ ദേവി എന്നനിലയിലാണ് ഈ അവസരത്തിൽ ലക്ഷ്മീദേവിക്ക് പ്രത്യേക പൂജകൾ സമർപ്പിക്കുന്നത്. തിന്മയുടെ മേൽ നന്മയുടെ വിജയം എന്ന നിലയ്ക്ക് പ്രകാശം സാർത്ഥകമായ പ്രതീകമാണ്. മര്യാദാ പുരുഷോത്തമനായ ശ്രീരാമചന്ദ്രന്റെ ആദർശമഹിമയുടെ വിജയമാണ് പിൽക്കാലത്ത് ദീപോത്സവമായി ആഘോഷിക്കപ്പെടുവാൻ ആരംഭിച്ചത്. വിക്രമാദിത്യ മഹാരാജാവ് ദീപാവലിദിനത്തെ തന്റെ സാമ്രാജ്യത്തിന് വർഷാരംഭദിനമായി പ്രഖ്യാപിച്ചു.