ടെന്നീസ് കോർട്ടിലെ ഗന്ധർവൻ

ടെന്നീസ് കോർട്ടിൽ സമാനതകളില്ലാത്ത നേട്ടങ്ങൾക്ക് ഉടമയാണ് റോജർ ഫെഡറർ

ആൽപ്സിന്റെ തണലിലെ റൈൻ നദീതടത്തിൽ നിന്ന് ആ ലോക ടെന്നീസിന്റെ തിരുവരങ്ങിലേക്ക് ഒരു പതിനാലുകാരൻ വന്നു, റോജർ ഫെഡറർ. ടെന്നീസ് ഭീമന്മാരെ മലർത്തിയടിച്ച ഫെഡറർ വിജയങ്ങൾ കൂമ്പാരം കൂട്ടി. റെക്കോഡുകൾ തിരുത്തിയെഴുതി. കാളപ്പോരിന്റെ പാരമ്പര്യം കളിക്കളത്തിൽ കാട്ടുന്ന റാഫേൽ നഡാലിനും യന്ത്രത്തിന്റെ കൃത്യത പുലർത്തുന്ന നൊവാക് ജോക്കോവിച്ചിനും തരാനാകാത്ത സൗന്ദര്യലഹരിയണ് ഫെഡറർ കഴിഞ്ഞ ഇരുപത്ത നാല് കൊല്ലം ആസ്വാദകരുടെ ഹൃദയചഷകങ്ങളിലേക്ക് പകർനത്. പ്രാവിനെപ്പോലെ ചിറകടിച്ചുയർന്നും ബാലെ നർത്തകരെ ലജ്ജിപ്പിക്കുന്ന വടിവോടെ ചലിച്ചും ഇരയെ നോട്ടമിട്ട് കുതിപ്പിനൊരുങ്ങുന്ന സിംഹരാജാവിനെപ്പോലെ ചുവടുകൾ വെച്ചും പുൽത്തകിടിയിൽ കൃഷ്ണമൃഗത്തിന്റെ ചേലോടെ കുതിച്ചും മർത്യലോകത്തിന് സ്വർഗീയസൗന്ദര്യം കനിഞ്ഞുതന്ന ഗന്ധർവൻ. എതിരാളികളുടെ മുഖക്കോണുകൾ വലിഞ്ഞു മുറുകി വിയർപ്പിൽ കുതിർന്നപ്പോ ഴും ആയാസത്തിന്റെ ശബ്ദങ്ങൾ പുറത്തു വന്നപ്പോഴും താളം പിഴയ്ക്കാതെ, ചുവടിടറാതെ, ശാന്തസൗകുമാര്യത്തോടെ, വർണശലഭത്തിന്റെ സ്വാഭാവികതയോടെ ഫെഡറർ കളിച്ചു. ഇയാൾ വിയർക്കാത്തതെന്തെന്ന് സഹകളിക്കാരൻ അന്തം വിട്ടു. എങ്ങനെയിത്ര അനായാസമായി കളിക്കുന്നുവെന്നും.

ആഗ്നേയശേഷിയുളളതും ടെന്നീസ് കണ്ടതിൽ ഏറ്റവും മികച്ചതുമായ ഫോർ ഹാൻഡും മനോഹരമായ സ്ലൈസും അന്യാ ദൃശ്യപൂർണതയുള്ള കുട്ടവർക്കും അപ്രതീക്ഷിതമായ സെർവുകളും... സാങ്കേതികമായ അളവുകോലു കൾക്ക് ഫെഡററുടെ കാൽപ്പനിക ചാരുത നിർവചിക്കാനായില്ല. റാക്കറ്റ് തച്ചുടയ്ക്കുന്ന ക്ഷുഭിത യുവാവിന്റെ മേലാപ്പ് ഫെഡറർ ക്ഷിപ്രവേഗത്തിൽ പറിച്ചെറിഞ്ഞു. കളിക്കളത്തിനകത്തും പുറത്തും വിവാദക്കറ പുരളാത്ത മാതൃകാപുരുഷനായി. വിനയവും മര്യാദയും ഫെഡററുടെ മകുടത്തിൽ ഇന്ദ്രനീലം പാകി. ആരാധകരോട് അളവറ്റ സ്നേഹവായ്പ്പും വിനയവും കരുതിയ ഫെഡറർ തന്റെ നർമ്മബോധം കൊണ്ട് കാണികളെ ഇളക്കിമറിച്ചു. കണ്ണുനീർ ദൗർബല്യമല്ല ശക്തിയാ ണെന്ന് ലോകത്തെ തിരുത്തി.