വെള്ളിനേഴിയിലെ കലാവഴികൾ

കലകളും കലാരൂപങ്ങളും പിറക്കുന്ന മണ്ണ്. ഇവിടെ നിന്ന് കേൾക്കുന്നത് കലയുടെ കഥകൾ മാത്രം

- SREELAL A G

പടർന്ന് പന്തലിച്ചു കിടക്കുന്ന വലിയ ആൽമരങ്ങൾക്കിടയിലൂടെയുള്ള കറുത്ത റോഡ് ഏതോ ചിത്രത്തെ ഓർമ്മിപ്പിച്ചു. മഴ നനഞ്ഞ റോഡിനിരുവശവും പാലക്കാടൻ ഗ്രാമഭംഗി വിളിച്ചോതുന്ന ഓടുമേഞ്ഞ വീടുകളാണ്. മഴക്കാറു നിറഞ്ഞ മാനം നോക്കി നൃത്തമാടാൻ വേണ്ടിയെന്നോണം മയിലുകൾ ഉറക്കെ ശബ്ദമുണ്ടാക്കിക്കൊണ്ട് റോഡ് മുറിച്ച് കടന്നുപോയി. വണ്ടി നേരെ ചെന്നുനിന്നത് വെള്ളനേഴി ഗവണ്മെന്റ് എൽ. പി.സ്കൂളിന്റെ മുന്നിൽ. രാമൻ കുട്ടിമാഷ് തോളിലൊരു തുണിസഞ്ചിയും തൂക്കി സ്കൂളിന് മുന്നിൽ തന്നെ കാത്തു നിൽപ്പുണ്ടായിരുന്നു. രാമൻ കുട്ടിമാഷ് നാട്ടുകാർക്ക് പ്രിയപ്പെട്ട രാമുട്ടി മാഷ് ആണ്. മാഷാണ് വെള്ളിനേഴിയിലെ വഴികാട്ടി. കൂടെ തന്നെ സുഹൃത്തായ കേശവൻ മാഷും മുരളിയേട്ടനുമുണ്ട്. ഗ്രാമത്തിലെ സ്കൂളിലെ പ്രധാന അധ്യാപകൻ എന്ന വലിയ സ്നേഹവും ആദരവും തരുന്ന പദവിയിൽ നിന്നും അദ്ദേഹം ഈ മാസം വിരമിക്കുകയാണ്. സ്കൂളിന്റെ പടിപ്പുര ശരിക്കും വെള്ളിനേഴിയുടെ ഗ്രാമപൈതൃകത്തിലേക്കുള്ള കവാടം കൂടെയാണ്. കണ്ടാൽ ഒരു സ്കൂളിന് പറ്റിയ സ്ഥലമാണോ എന്ന് തോന്നിപ്പോകും. ചരിഞ്ഞ പ്രദേശത്ത് മനോഹരമായി രൂപകൽപ്പന ചെയ്ത കാമ്പസ്. ചരിഞ്ഞ ഇറക്കത്തിനെ കുട്ടികൾക്ക് ഊർന്നിറങ്ങാനുള്ള സ്ലൈഡ് ആയിട്ടാണ് ഡിസൈൻ ചെയ്തിട്ടുള്ളത്. പടിപ്പുര കടന്നാൽ തന്നെ ഗാന്ധിപ്രതിമ. സാധാരണ കാണുന്നൊരു ഗാന്ധിപ്രതിമയല്ല അത്. സമരമുഖത്തേക്ക് നിശ്ചയദാർഢ്യത്തോടെ ധൃതിയിൽ നടന്നുപോവുന്ന മഹാത്മാവിന്റെ ശിൽപമാണിത്. പ്രതിമ നിൽക്കുന്ന മണ്ഡപത്തിനുള്ളിൽ നിറയെ വെള്ളിനേഴിയിലെ മഹാനുഭാവന്മാരുടെ ചിത്രങ്ങൾ കാണാം. മഹാകവി ഒളപ്പമണ്ണ, ഋഗ്വേദം മലയാളത്തിലേക്ക് മൊഴിമാറ്റം ചെയ്ത ഒ.എം.സി നാരായണൻ നമ്പൂതിരി പാട്, കഥകളി ആചാര്യൻ പട്ടിക്കാംതൊടി രാവുണ്ണിമേനോൻ, കീഴ്പടം കുമാരൻ നായർ, പദ്മഭൂഷൺ ഡോ.കലാമണ്ഡലം രാമൻ കുട്ടി നായർ തുടങ്ങി ഒരു പാട് പ്രതിഭകളുടെ ചിത്രങ്ങൾ ഇവിടെയുണ്ട്. സ്കൂളിൽ നി ന്ന് ഇറങ്ങാൻ നേരമാണ് ഒരു കാര്യം ശ്രദ്ധിച്ചത്. രാമുണ്ണി മാഷ് വിരമിക്കുന്നതിനോടനുബന്ധിച്ച് സ്കൂളിലെ കൊച്ചുകലാകാരന്മാരും കലാകാരികളും വരച്ച മാഷിന്റെ പോർട്രെയ്റ്റുകൾ വലിയ ചുമരിൽ പതിച്ചുവെച്ചിരിക്കുന്നു. നൂറോളം ചിത്രങ്ങൾ ഉണ്ടാവും. വെളുത്ത താടിയും മുടിയും വട്ടമുഖവുമുള്ള അദ്ദേഹത്തോടുള്ള സ്നേഹം കുട്ടികൾ ഭംഗിയായിത്തന്നെ വരച്ചിട്ടുണ്ട്. വിരമിക്കുന്ന ഒരധ്യാപകന് ഇതിൽ പരം എന്തു വേണം.

ഒളപ്പമണ്ണ മന