ധാർഡി ഭൂമിയിലെ സ്വർഗത്തുണ്ട്

ഹിമാചലിലെ അധികമാരും കടന്നെത്താത്ത ഒരു ഗ്രാമം, ധാർഡി മലമുകളിലെ പഴത്തോട്ടങ്ങൾക്ക് നടുവിലെ ആ സ്വർഗഭൂമി ആത്മാവിൽ ആനന്ദത്തിന്റെ അലകളുണർത്തും

- DIPIN AUGUSTINE

ജൂണിലെ ആദ്യ ദിവസങ്ങളിലൊന്നിൽ, രാത്രി ജോലിയുടെ ആയാസത്തിനൊടുവിൽ പുലർച്ചെ മൂടിപ്പുതച്ചുറങ്ങുമ്പോഴാണ് ഫോൺവിളിയെത്തിയത്, മറുതലയ്ക്കൽ ഹിമാചലിൽനിന്ന് ജോൺസൺ. ഒരിക്കൽ ഹിമാചലിലെ ബാഹു എന്ന ഗ്രാമത്തിലേക്ക് പുറപ്പെട്ട എനിക്ക് ജോൺസന്റെ നിർദേശപ്രകാരമാണ് സിർട്ടി എന്ന ഹിമാലയൻ ഗ്രാമത്തിലേക്ക് സഞ്ചാരപഥം മാറ്റേണ്ടിവന്നത് (മാതൃഭൂമി യാത്ര-2022 ജനുവരി ലക്കം). ബാഹുവിൽ നിന്ന് ഉയരെ അനന്തവാലിയിലെ ധാർഡി'എന്ന ഗ്രാമ ത്തിലെ പുതിയ ഫാം സ്റ്റേയെക്കുറിച്ചുള്ള വിശേഷമാണ് മൂപ്പർ ഇത്തവണ പങ്കുവെച്ചത്. മൺസൂൺ കേരളത്തിൽ എത്തിയിട്ടേയുള്ളൂ, പോവുന്നെങ്കിൽ മഴ തുടങ്ങുന്നതിനു മുൻപ് അവിടെ എത്തിച്ചേരണം. പെട്ടെന്ന് യാത്രയ്ക്കൊരുങ്ങിയതിനാൽ വിമാനക്കൂലി താങ്ങാവുന്നതിലും അപ്പുറമായിരുന്നു. അങ്ങനെ മഴയെ അറിഞ്ഞ് കൊങ്കണിലൂടെ ഒരു തീവണ്ടിയാത്രയാണ് തിരഞ്ഞെടുത്തത്. മഹാരാഷ്ട്രവരെ മഴ കൂടെത്തന്നെ ഉണ്ടായിരുന്നു. എന്നാൽ ഡൽഹിയിലെത്തിയപ്പോൾ 40 ഡിഗ്രിക്കു മേൽ ആയിരുന്നു താപനില.

വൈകീട്ടുള്ള ഹിമാചൽ റോഡ് ട്രാൻസ്പോർട്ട് ബസിൽ ടിക്കറ്റ് ബുക്ക് ചെയ്തിരുന്നു. ISBT ബസ് ടെർമിനലിൽ നി ന്ന് ഔട് വരെയുള്ള ടിക്കറ്റുമായി മണാലി ബസിൽ കയറി. സമയം അഞ്ചുമണി കഴി ഞ്ഞെങ്കിലും പുറത്തുനിന്നെത്തുന്ന കാ റ്റിൽ തീനാളങ്ങൾ ഉണ്ടെന്നുതോന്നി. നിറം മങ്ങിയ ബസിൽ ഉണ്ടായിരുന്ന എല്ലാ മുഖ ങ്ങളിലും ഒരേ ഭാവമായിരുന്നു, ഉഷ്ണക്കാറ്റിന്റെ മടുപ്പ്. പിറകിലെ സീറ്റിൽ നിന്നും മലയാളത്തിലുള്ള സംസാരം കേട്ട് തിരിഞ്ഞുനോക്കി. ഒരു യുവാവ് ഉച്ചത്തിൽ ഫോൺ ചെയ്യുന്നു. രാത്രി പത്ത് മണിയോടെ അത്താഴം കഴിക്കാനായി വഴിയരികിലെ ധാബയിൽ ബസ് നിർത്തി. ചായ കുടിച്ച് പെട്ടെന്ന് ബസിലേക്ക് എത്തിയപ്പോൾ നേരത്തേ കണ്ട യുവാവ് പരിഭ്രമിച്ചുകൊണ്ട് ഉള്ളിൽ നിന്നിറങ്ങിവരുന്നു. എന്തുപറ്റി? ഹിന്ദിയിലാണ് ചോദിച്ചത്. “എന്റെ ബാഗ് ബസിൽ കാണുന്നില്ല. അറിയാവുന്ന ഹിന്ദി വാക്കുകൾ തപ്പിപ്പെറുക്കി അയാൾ പറഞ്ഞു. “വരൂ നോക്കാം, ഞങ്ങൾ ബസിലേക്ക് കയറി. ഏറ്റവും പിന്നിലെ സീറ്റായിരുന്നു കക്ഷിയുടേത്. അവിടം ശൂന്യമാണ്. എന്റെ സീറ്റിലും നോക്കി. എന്റെ ബാഗും ഇല്ല. ചുറ്റുപാടും വീക്ഷിച്ചപ്പോഴാണ് കാര്യം മനസ്സിലായത്. അത് ഞങ്ങൾ വന്ന ബസ് ആയിരുന്നില്ല!