മഹാവൈദ്യനാഥൻ സന്നിധിയിൽ

ഓരോ ദേശത്തിനുമുണ്ട് ഒരു ഗ്രാമദേവത. പെരിഞ്ചെല്ലൂരിന്അത് മൂന്ന് ദേവന്മാരാണ്. തളിപ്പറമ്പ് രാജരാജേശ്വരനും തൃച്ചംബരത്ത് ശ്രീകൃഷ്ണനും  കാഞ്ഞിരങ്ങാട്ടെ വൈദ്യനാഥനും. മഹാവൈദ്യനായ കാഞ്ഞിരങ്ങാട്ടപ്പന്റെ കേൾവി കേട്ട മണ്ണിലേക്കാണ് ഈ സഞ്ചാരം..

- AAMY ASWATHY

പഴയ പെരിഞ്ചെല്ലൂർ ഗ്രാമത്തിന്റെ ഉയിര് ഇന്നും ഉണർന്നിരിക്കുന്നുണ്ട് തളിപറമ്പിൽ എന്നുതോന്നും. അവിടുത്തെ മണ്ണിലും മനുഷ്യരുടെ മനസ്സിലും പോയകാലം വിട്ടുപോകാതെയുണ്ടെന്ന് ഈ നാട്ടുവഴികളിലൂടെയുള്ള നടത്തം ഓർമിപ്പിക്കും. തളിപ്പറമ്പ് കാഞ്ഞിരങ്ങാട് വൈദ്യനാഥന്റെ ക്ഷേത്രമുറ്റത്തേക്കാണ് ഈ യാത്ര. ദേശഭേദമില്ലാതെ ഭക്തർ രോഗശാന്തി തേടിയെത്തുന്ന മഹാവൈദ്യന്റെ നടയിലേക്ക്...

കേരളത്തിലെ പഴക്കം ചെന്ന ബ്രാഹ്മണ ഗ്രാമമാണ് പെരിഞ്ചെല്ലൂർ. പോകും വഴി തൃച്ചംബരം ശ്രീകൃഷ്ണനുണ്ട്. കാഞ്ഞിരങ്ങാട്ടേക്ക് തിരിയുന്നിടത്തുനിന്ന് അല്പം മുൻപോട്ടുപോയാൽ സാക്ഷാൽ രാജരാജേശ്വരനുമുണ്ട്. തളിപ്പറമ്പിൽ നിന്ന് ആറുകിലോമീറ്ററോളം പോകണം കാഞ്ഞിരങ്ങാട് സന്നിധിയിലേക്ക്. ദേവസ്ഥാനങ്ങൾ ചേരുന്നതാണ് പെരിഞ്ചെല്ലൂരിന്റെ ക്ഷേത്രപ്പെരുമ. ഓരോയിടത്തും മൂർത്തികൾക്ക് വ്യത്യസ്തഭാവങ്ങളാണ്.

മഴ പെയ്തൊഴുകിപ്പോയ വഴിയിലൂടെ മുന്നോട്ടുപോയപ്പോൾ പ്രവേശനകവാടം കണ്ടു. നഗരത്തിന്റെ കോലാഹലങ്ങളില്ലാതെ, ഗ്രാമപ്പച്ച നിറയുന്ന ഇടം. അലങ്കാരവും ആഡംബരവുമില്ലാത്ത പടിപ്പുര കടന്നാൽ തട്ടുതട്ടായി ചെങ്കല്ല് കെട്ടി തിരിച്ച ക്ഷേത്രപ്പറമ്പ്. വലതുഭാഗത്ത് കെട്ടിയുയർത്തിയ ആൽത്തറ. കുറച്ചുമാറി, ഇടത്ത് വലിയൊരു കാഞ്ഞിരത്തറയും അല്പം മാറി മറ്റൊരു ആൽത്തറയും കാണാം. മതിൽക്കെട്ടോടുചേർന്ന് പ്രധാന കവാടം കടന്നപ്പോൾ കണ്ടു, ലളിതഭംഗിയിൽ വൈദ്യനാഥന്റെ ക്ഷേത്രം.

ഇടതുവശത്തായി വഴി പാട് കൗണ്ടറിനു മുൻപിൽ ചെറിയ ക്യൂവുണ്ട്. വാരാന്ത്യത്തിൽ തിരക്കേറും. വെണ്ണ പൊതിഞ്ഞ ധാരയാണ് ഇവിടത്തെ പ്രധാന വഴിപാട്. ഒരു ലിറ്റർ പാൽ, അരക്കിലോ വെണ്ണ എന്നിവയാണ് ഇതിനുപയോഗിക്കുക. ശിവലിംഗത്തിന്റെ മൂർധാവിൽ വെണ്ണകൊണ്ട് തടമുണ്ടാക്കി, വിശേഷമന്ത്രങ്ങൾ ചൊല്ലി ഇടമുറിയാതെ പാൽ ധാര ചെയ്യുന്നു. രോഗശാന്തിക്ക് ആൾരൂപം നടയിൽ വെച്ച് പ്രാർഥിക്കുന്നവരെയും കണ്ടു. ഇതിന് പത്തുരൂപയക്ക് രസീതാക്കണം.