ഈസ്താംബൂളിലെ രാജകീയസ്നാനം

ഈസ്താംബൂളിലെ ടർക്കിഷ് ഹമാമിലെ കുളി വെറുമൊരു കുളിയല്ല, പലഘട്ടങ്ങളുള്ള രാജകീയസ്നാനം തന്നെയാണ്

- DR.SALEEMA HAMEED

വെറുമൊരു കുളി എന്നതിലുപരി ടർക്കിഷ് ഹമാമിലെ സ്നാനം, ഓരോരുത്തർക്കും ഒരു സുൽത്താനയായി പരിചരിക്കപ്പെടാനുള്ള അവസരം കൂടിയാണ്. പണ്ടു കാലത്ത് വീടുകളിൽ കുളിപ്പുരകൾ സാധാരണമായിരുന്നില്ല. അങ്ങനെയാണ് പൊതുസ്നാനഘട്ടങ്ങളിൽ പോകുന്ന സംസ്കാരമുണ്ടായത്. കുളിപ്പുരകൾ റോമൻ ഭരണകാലം മുതൽ നിലവിലുള്ളതാണ്. ഓട്ടോമൻ ഭരണകാലത്താണ് സ്ത്രീപുരുഷന്മാർക്കുവേണ്ടി ഇത് വിഭജിക്കപ്പെടുന്നത്. അടുത്തിടെ തുർക്കിയിലെ ഈസ്താംബൂൾ സന്ദർശിച്ചപ്പോൾ ഇത്തരമൊരു ഹമാമിൽ പോകാനും അവരുടെ രീതികൾ പരിചയപ്പെടാനും സന്ദർഭം ലഭിച്ചു. ഹമാം എന്നത് പൊതുകുളിപ്പുരകൾക്കുള്ള ടർക്കിഷ് പേരാണ്.

പതിനാറാം നൂറ്റാണ്ടിൽ നിർമിക്കപ്പെട്ടതും ഓട്ടോമൻ രാജകുടുംബാംഗങ്ങൾ ഉപയോഗിച്ചിരുന്നതുമായ കിലിക്ക് അലി പാസ ഹമാം' ആണ് ഇതിനായി തിരഞ്ഞെടുത്ത്, ഓട്ടോമൻ സൈന്യാധിപനായിരുന്ന കിലിക്ക് അലി പാസയുടെ നിർദേശമനുസരിച്ച് അക്കാലത്തെ പ്രശസ്ത ശിൽപിയായിരുന്ന സിനാന്റെ നേതൃത്വത്തിലാണ് ഇത് നിർമിക്കപ്പെട്ടത്.