ബെറാത്ത് ഒരു അൽബേനിയൻ നിശാനക്ഷത്രം

വൈവിധ്യമാർന്ന സംസ്കാരങ്ങളുടെ കളിത്തൊട്ടിലാണ് അൽബേനിയ. യൂറോപ്പിലെ മറ്റൊരു നഗരത്തിലും സ്വന്തം ദേശവുമായി ഇത്രയേറെ അലിഞ്ഞുചേർന്നുനിൽക്കുന്ന മനുഷ്യരെ കണ്ടിട്ടില്ലെന്ന് സാക്ഷ്യപ്പെടുത്തുകയാണ് യാത്രികൻ...

-  TEXT & PHOTOS: MANSOOR AHAMMED

അൽബേനിയയുടെ തലസ്ഥാനമായ ടിരാനയിൽനിന്ന് ബൈറാത്തിലേക്കുള്ള യാത്രയിലായിരുന്നു ഞങ്ങൾ. ഒരു യൂറോപ്യൻ രാജ്യത്തിന്റെതായ മായികകാഴ്ചകളൊന്നും അവകാശപ്പെടാനില്ലാത്ത വഴികളും ഗ്രാമങ്ങളുമാണ് പിന്നിട്ടതത്രയും. ഇടയ്ക്കിടെ പ്രത്യക്ഷപ്പെടുന്ന മുന്തിരിയും ചോളവും കൃഷിചെയ്യുന്ന വിശാലമായ പാടങ്ങൾ കർണാടകയിലെ ഉൾനാടൻ ഗ്രാമങ്ങളെ ഓർമിപ്പിച്ചു. ടൊമോർഷ്പിരാഗ് പർവതങ്ങൾക്കിടയിൽ ഒരു നദീതീരത്ത് 2,400 വർഷങ്ങൾക്കുമുൻപ് നിർമിക്കപ്പെട്ട നഗരമാണിത്. ബെറാത്തിലെത്തുന്നതോടെ നമ്മളും ആ നാട്ടുകാരായി മാറുന്നു. പാതയോരങ്ങളിൽ കായ്ച്ചു നിൽക്കുന്ന ചെസ്റ്റ്നട്ട് മരങ്ങൾക്കുതാഴെ ഡൊമിനസും ചെസ്സും കളിക്കുന്ന വയോധികർ, അവരോടൊപ്പം ചേരാൻ സഞ്ചാരികളെ ക്ഷണിക്കുന്നു. യൂറോപ്പിലെ മറ്റൊരു നഗരത്തിലും സ്വന്തം ദേശവുമായി ഇങ്ങനെ അലിഞ്ഞു ചേർന്നുനിൽക്കുന്ന മനുഷ്യരെ കണ്ടിട്ടില്ല.

അലാബി എന്ന എഴുപതിനടുത്ത് പ്രായമുള്ള മനുഷ്യനുമുന്നിൽ ചെസ്ബോർഡിൽ രണ്ടാമത്തെ റൗണ്ടും പരാജയപ്പെട്ടിരിക്കുന്ന എന്റെ കൈയിലേക്ക് ഫ്ളാസ്കിൽ ബാക്കിയുള്ള ചായയും ഒഴിച്ചുകൊണ്ട് അയാൾ പറഞ്ഞു: “ഞാനെത്തിയിട്ട് ഉറങ്ങാൻ കാത്തിരിക്കുന്നൊരു കൊച്ചുമോളുണ്ട് വീട്ടിൽ. ഞാനിറങ്ങുന്നു, ഞങ്ങളുടെ നാട് നിങ്ങൾക്ക് ഇഷ്ടപ്പെടുമെന്ന് എനിക്കുറപ്പുണ്ട്. ചെസ്റ്റ്നട്ട് മരങ്ങൾക്കിടയിലൂടെ ഇരുട്ടും മുന്നേ വീടെത്താൻ അലാബി നടന്നു. മലഞ്ചെരുവുകളിൽ കാണുന്ന ആയിരക്കണക്കിന് വീടുകളിൽ ഏതായിരിക്കും അലാബിയുടെ വീട്? ആ പെൺകുട്ടിയുടെ പേര് ചോദിക്കാൻ മറന്നുപോയതിലെനിക്ക് സങ്കടം തോന്നി.

നദീതീരങ്ങളിലെ സാധുജീവിതങ്ങൾ

ഒന്നും നദിയുടെ തീരത്ത് പുറമ്പോക്കിലെ കൃഷിപോലെ ചോളം കായ്ച്ചു നിൽപ്പുണ്ട്. കൃഷി, അൽബേനിയക്കാരുടെ ജീവിതത്തിന്റെ ഭാഗമാണെന്ന് തിരിച്ചറിയുന്ന വേറേയും അനുഭവങ്ങളുണ്ട്. ഉപേക്ഷിക്കപ്പെട്ട ഒരു പുരാതന നഗരത്തിന്റെ അവശിഷ്ടങ്ങൾ ഇപ്പോഴും ബാക്കിയുണ്ടെന്നറിഞ്ഞപ്പോൾ അവിടേക്ക് പുറപ്പെട്ടു. ബെറാത്തിൽ നിന്ന് അൻപതോളം കിലോമീറ്റർ യാത്രയുണ്ട് അവിടേക്ക്, സൈമൺ എന്ന മധ്യവയസ്കനായിരുന്നു സാരഥി. അൽബേനിയയുടെ ഉൾനാടൻ ഗ്രാമങ്ങളിലൂടെ വണ്ടി നീങ്ങിക്കൊണ്ടിരുന്നു.