வில்லங்க, விநோத காதலர்கள்!

'உனக்காக வானவில்லை வளைப்பேன், தாஜ்மகால் அமைப்பேன்...' எல்லாம் சரி, எனக்காக எக்சாம் எழுதுவியா?' அப்படித்தான் ஆரம்பித்தாள் காதலென்னும் தேர்வெழுதி காத்திருந்த மாணவனிடம், சாரி, காதலனிடம்.

கடந்த ஜனவரி 7ஆம் தேதி பஞ்சாப் மாநிலத்தில் சுகாதாரத் துறை பணியாளர்களுக்காக டிஏவி பப்ளிக் பள்ளியில் நடைபெற்ற அந்த தேர்வில் தான் அந்த அழகி கலந்துகொண்டாள்.

கைவளையல்கள் கலகலக்க, மைவிழி மயமயக்க, உதடுகள் சுளி, சுளிக்க வந்து அமர்ந்தவளிடம், மின்னணு தேர்வு முறை என்பதால் விரல் ரேகைகளை பதிவு செய்யக்கேட்டார் தேர்வு அலுவலர். எவ்வளவு முயன்றும் விரல்ரேகை பொருந்தவில்லை.

அப்போதுதான் அவளது அதீத மேக் அப் ஐயப்பாட்டை உருவாக்கியது. துருவி விசாரித்த போதுதான் அவள், காதலிக்காக, காதலி ரூபத்தில் தேர்வெழுத வந்த காதலன் என்பது தெரியவந்தது.

நுழைவுச்சீட்டு, அடையாள அட்டை என அனைத்தையும் பக்காவாக பிளான் பண்ணிக் கொண்டு வந்திருந்தவன், கட்டை விரல் ரேகையால் மாட்டிக்கொண்டான்.