மேவாட் கொள்ளையர்கள் கதை!

வடமாநில கொள்ளையர்கள் பற்றி பல கதைகள் கேள்விப் பட்டிருப்போம். திருட்டையே தங்கள் குல தொழிலாக கொண்டு ஹைடெக் ஐடியாவுடன் கொள்ளை அடிக்கும் பல கும்பல், தென் இந்தியாவை குறி வைத்து இயங்கிக் கொண்டே இருக்கிறது.

- தவா

அந்த வரிசையில் கேரளாவில் கைவரிசையை காட்டி விட்டு தப்பும் போது தமிழ்நாட்டு போலீசிடம் சமீபத்தில் வகையாக சிக்கியுள்ளனர் மேவாட் கொள்ளையர்கள்.

வடமாநில பவாரியா கொள்ளையர்கள் 1995 முதல் 2006 வரையிலான காலகட்டத்தில் தமிழ்நாட்டையே நடுநடுங்கச் செய்தவர்கள். கும்பலாக வீட்டில் புகுந்து கழுதை அறுத்து கொலை செய்து விட்டு பொருட்களை கொள்ளையடித்துச் செல்வது இவர்களது பாணி.

அதற்கு நேர் எதிராக, காந்தியவாதிகள் போல அஹிம்சை பாணியில் யாரையும் காயப்படுத்தாமல் திட்டம் போட்டு கொள்ளையடிப்பது ராம்ஜி நகர் கொள்ளையர்கள்.

இவர்கள் பிளைட் பிடித்து திருடச் செல்லும் ஹைடெக் கொள்ளையர்களும் கூட.

இந்த ரெண்டு கும்பலுக்கும் நடுவில், புத்திசாலித்தனமாக கொள்ளையடித்து விட்டு சத்தமே இல்லாமல் தப்பிச் செல்லும் புதுவிதமான கும்பல் தான் மேவாட் கொள்ளையர்கள்.

ஏ.டி.எம்.களை குறி வைத்து கொள்ளையடிப்பதில் இவர்கள் கைதேர்ந்தவர்கள். ஒருவேளை தெரியாமல் மாட்டிக் கொண்டால், தாக்கி விட்டு தப்பிச் செல்ல ஆயுதங்கள் இவர்களிடம் எப்போதும் கைவசம் இருக்கும்.

சமீபத்தில் கேரள மாநிலம் திருச்சூரில் 3 ஏ.டி.எம் மையங்களில் அடுத்தடுத்து ரூ.66 லட்சம் பணம் கொள்ளையடிக்கப்பட்டது.

இந்த துணிகர கொள்ளையில் ஈடுபட்ட வட மாநில கொள்ளையர்கள் ராஜஸ்தான் பதிவெண் கொண்ட கண்டெய்னர் லாரியில் சுற்றித் திரிவதாக தமிழக போலீசாருக்கு தகவல் கிடைத்தது.