മാനവികതയുടെ മറുവാക്ക്

പാദമുദ്ര

- സജിൽ ശ്രീധർ

 ചുറ്റും കിളിർക്കുന്ന ചെറുതൈകളെ ഭീമാകാരമായ ശിഖരങ്ങൾ കൊണ്ട് മറച്ച് വളരാൻ അനുവദിക്കാത്തവരുടെ നാടാണ് കേരളം. മരണം വരെ എല്ലാം തനിക്ക് മാത്രം ലഭിക്കണം എന്ന് വിശ്വസിച്ച് അതിനായി പോരാടുന്ന അതിസ്വാർത്ഥമതികളായ അസുരൻമാരുടെ നാട്. അക്കൂട്ടത്തിൽ ഒറ്റപ്പെട്ട് നിൽക്കുന്ന അപൂർവം ചിലരേയുളളൂ. അത്തരമൊരു തണൽവൃക്ഷത്തിന്റെ പേരാണ് ഡോ. ജോർജ് ഓണക്കൂർ, തനിക്ക് പിൻപേ വരുന്നവരും എഴുതണം വളരണം പന്തലിക്കണം എന്ന് ആത്മാർത്ഥമായി ആഗ്രഹിച്ച് അതിനായി മനസു കൊണ്ട് എങ്കിലും പിൻബലം നൽകുന്ന മഹാമനസ്കത അദ്ദേഹത്തിനുണ്ട്. സാഹിത്യത്തിൽ ഇത് ചെറിയ കാര്യമല്ല.

എന്റെ അറിവിൽ കേരളത്തിൽ ഏറ്റവുമധികം പുസ്തകങ്ങൾക്ക് അവതാരിക എഴുതിയിട്ടുളളത് ഓണക്കൂർ സാറാണ്. പ്രത്യേകിച്ചും നവാഗതരായ എഴു ത്തുകാർക്ക് മുൻപരിചയമില്ലാത്ത ഒരാൾ പോലും വിളിച്ച് അവതാരിക ആവശ്യപ്പെട്ടാൽ അദ്ദേഹം ഒരു മടിയും കൂടാതെ അത് നിർവഹിക്കും. വളരാൻ കൊതിക്കുന്ന മനസുകൾക്ക് ഒരു കൈ സഹായം എന്നതാണ് സിദ്ധാന്തം. തന്റെ വിലയേറിയ സമയം നഷ്ടപ്പെടുമെന്നതോ സാമ്പത്തിക ലാഭമില്ലെന്നതോ ഒന്നും അദ്ദേഹം വിഷയമാക്കാറില്ല.

ഈ മനസ് എങ്ങനെയുണ്ടായി എന്ന ചോദ്യത്തിന് ഉത്തരം അടിസ്ഥാനപരമായി അദ്ദേഹം ഒരു അദ്ധ്യാപകനാണ് എന്നതാണ്. പിൻ തലമുറകളുടെ ക്ഷേമം ആത്മാർത്ഥമായി ആഗ്രഹിക്കുന്ന ഒരു ഗുരുവര്യൻ.