അർബുദത്തെ തോൽപ്പിച്ച പ്രണയം

സംഗീതജ്ഞനായ ഭർത്താവുമൊത്ത് ജീവിതം തന്നെ മധുര സംഗീതമാക്കിയ നിമിഷ പ്രണയം തോൽപ്പിച്ച കാൻസറിന്റെ കഥ പറയുന്നു.

- ഉമ ആനന്ദ്

ഹൈസ്കൂൾ പഠനകാലത്ത് തന്നെ പിടികൂടിയ മരണത്തിന്റെ പര്യായമായിരുന്ന രക്താർബുദത്തെ അപാരമായ ആത്മവിശ്വാസം കൊണ്ടും തളരാത്ത ഇച്ഛാശക്തി കൊണ്ടും കെടാത്ത ശുഭപ്രതീക്ഷ കൊണ്ടും പൊരുതി തോൽപ്പിക്കുകയും അർബുദമാണെന്നറിഞ്ഞിട്ടും സഹാനുഭൂതിക്ക് പകരം പത്തരമാറ്റ് പ്രണയത്തിന്റെ പൂക്കൾ നൽകിയ സഹപാഠിയെ ജീവിത പങ്കാളിയാക്കിയും രോഗത്തിന്റെ പീഡനകാലത്ത് ചേർത്ത് പിടിച്ച ഡോക്ടർ നൽകിയ ധൈര്യത്താൽ ഇരട്ടക്കുട്ടികളുടെ അമ്മയാവുകയും സംഗീതജ്ഞനായ ഭർത്താവുമൊത്ത് ജീവിതം തന്നെ മധുര സംഗീതമാക്കിയ നിമിഷ പ്രണയം തോൽപ്പിച്ച കാൻസറിന്റെ കഥ പറയുന്നു.

“ഞാൻ ജനിച്ചത് എറണാകുളത്തെ ലക്ഷ്മി ഹോസ്പിറ്റലിലാണ്. 13 വർഷങ്ങൾക്ക് ശേഷം വീണ്ടും അതേ ആശുപത്രിയിൽ 3 വർഷം തുടർച്ചയായി ചികിത്സ. എട്ടാം ക്ലാസിൽ പഠിക്കുമ്പോൾ ഫെബ്രുവരി മാസത്തിലാണ് എനിക്ക് ആദ്യത്തെ ആർത്തവം ഉണ്ടാകുന്നത്. അതിനടുത്ത മാസം നല്ല പനി. പനി വരാൻ പ്രത്യേകിച്ച് കാരണം ഒന്നും ഉണ്ടായിരുന്നില്ല. എന്നാൽ മാറുന്നുമില്ല. അപ്പോഴാണ് ലക്ഷ്മി ഹോസ്പിറ്റലിലെ ഡോ. വാര്യരെ കാണുന്നത്. പനിക്കുള്ള മരുന്നും വാങ്ങി തിരിച്ചെത്തി. മരുന്ന് കഴിച്ച് കഴിഞ്ഞ് കുറച്ചു നേരം പനിയുണ്ടാവില്ല. വീണ്ടും പൂർവ്വാധികം ശക്തിയോടെ തിരിച്ച് വരും. മൂന്നു ദിവസമായിട്ടും നിലയിൽ മാറ്റമില്ല. വീണ്ടും ഡോക്ടറുടെ അടുത്തേക്ക്. അപ്പോഴാണ് ഡോക്ടർ രക്ത പരിശോധന വേണമെന്ന് പറഞ്ഞ് രക്തം പരിശോധിച്ചത്. പരിശോധനാ ഫലത്തിൽ ടോട്ടൽ കൗണ്ട് കുറവും പ്ലേറ്റ്ലെറ്റ് കൂടുതലും. ഡോക്ടർക്ക് കാര്യം മനസ്സിലായി. എന്റെ അമ്മയുടെ ചേച്ചി ലക്ഷ്മി ഹോസ്പിറ്റലിൽ നഴ്സാണ്. അവരോട് ഡോക്ടർ കാര്യങ്ങൾ പറഞ്ഞു. എന്റെ അമ്മയും മറ്റൊരു ആശുപത്രിയിൽ നഴ്സായിരുന്നു.