പറക്കാൻ

ആത്മവിശ്വാസത്തിന്റെ കരുത്തുമായാണ് തനിക്ക് മുന്നിലേക്ക് ഇരച്ചുകയറിയ പ്രതിസന്ധികളെ സ്വർണ്ണ അഭിമുഖീകരിച്ചത്. പതിനെട്ടാം വയസ്സിൽ അപ്രതീക്ഷിതമായ ആ വിധി സ്വർണ്ണയെ കീഴടക്കിയപ്പോൾ പൊരുതാൻ തയ്യാറായ ആ പെൺകുട്ടി തന്റെ വിശ്വാസങ്ങളെ മുറുകെപ്പിടിച്ച് മുന്നോട്ടു നടന്നു... സ്വപ്നങ്ങൾ കാണാൻ ആഗ്രഹിക്കുന്ന സ്വർണ്ണ എന്ന പെൺകുട്ടി മലയാളികൾക്ക് അപരിചിതയല്ല. ഡാൻസ് റിയാലിറ്റി ഷോകളിൽ തിളങ്ങിനിന്നിരുന്ന സ്വർണ്ണ ജീവിതപ്രതിസന്ധികളെ അതിജീവിച്ച് ഒൻപത് വർഷങ്ങൾക്കുശേഷം ശക്തമായ തിരിച്ചുവരവ് നടത്തുകയാണ്... വേറിട്ട വഴികളിലൂടെ നടന്നുകയറിയ സ്വർണ്ണയുടെ പ്രചോദനാത്മകമായ കഥ ഇതാ...

- അപ്പൂസ്. കെ.എസ്

സ്വപ്നങ്ങളാണ് മുന്നോട്ടു നയിക്കുന്നത്

ജീവിതത്തെ പിടിച്ചുകുലുക്കുന്ന ചില സ്വപ്നങ്ങളുണ്ട്. ആ സ്വപ്നങ്ങൾ ചിലപ്പോൾ ഉറങ്ങാൻ പോലും അനുവദിച്ചെന്ന് വരില്ല. നമ്മെ മുന്നോട്ടു നയിക്കുന്ന വലിയൊരു ശക്തിയാണ് അത്തരം സ്വപ്നങ്ങൾ. നല്ല സ്വപ്നങ്ങൾ കാണാൻ കഴിയുക എന്നുപറയുന്നത് വലിയൊരു ഭാഗ്യമായി തന്നെയാണ് ഞാൻ കാണുന്നത്. എന്റെ കാര്യത്തിൽ പലപ്പോഴും വലിയ സ്വപ്നങ്ങളെക്കാൾ ഞാൻ കണ്ടിരുന്നത് ഞാൻ മുൻപ് എന്തായിരുന്നു, അവിടേക്ക് തിരിച്ചെത്താനുള്ള എന്റെ പ്രത്യാശകൾ തന്നെയായിരുന്നു എന്റെ സ്വപ്നങ്ങൾ. ആ സ്വപ്നങ്ങൾക്ക് വലിയ ഭംഗിയുണ്ടായിരുന്നു.

ജീവിതത്തെ പിടിച്ചുകുലുക്കിയ ആ ദിവസം