പ്രായം വെറും നമ്പറാണ്

കോമഡി സ്കിറ്റുകൾ എഴുതി, മിനിസ്ക്രീനിൽ തിളങ്ങി, ഇപ്പോഴിതാ സംവിധായികക്കുപ്പായമണിഞ്ഞ് രജനികൃഷ്ണ

- ബിന്ദു പി.പി

 മുൻപ് കോമഡി സ്കിറ്റുകൾ കാണുമ്പോൾ അതിലെ കോമഡികളെ പലയാവർത്തി വിമർശിച്ചിട്ടുണ്ട്. സാധാരണ ജീവിതത്തിൽ നമ്മൾ പറയുന്ന പല കോമഡികൾ ഒപ്പം നിൽക്കുന്നവർക്ക് കണക്ട് ചെയ്യാൻ കഴിയുന്നതുകൊണ്ടു തന്നെ കോമഡി സ്കിറ്റുകൾക്കുവേണ്ടി സ്ക്രിപ്റ്റ് എഴുതുക എന്നത് വളരെ നിസ്സാരമായി കണ്ട ഒരാളാണ് ഞാൻ. പക്ഷേ അത് ചെയ്തുതുടങ്ങിയപ്പോ ഴാണ് കോമഡി എഴുതാനും അത് ഫലിപ്പിക്കാനുമാണ് ഏറ്റവും പ്രയാസമെന്ന് മനസ്സിലാക്കുന്നത്. നൂറ്റമ്പതോളം വരുന്ന സീനിയർ കോമഡി ആർട്ടിസ്റ്റു മാർക്ക് നടുവിലേക്ക് കോമഡി സ്കിറ്റ് എഴുതുവാനായി ടിനി(ടിനിടോം) ചേട്ടൻ കൈ പിടിച്ചു കൊണ്ട് വരുമ്പോൾ നീന്താൻ അറിയാത്ത ഒരു കുഞ്ഞുമീനിനെ ഒഴുക്കുള്ള വെള്ളത്തിൽ കൊണ്ടു പോയിടുന്ന പോലെയായിരുന്നു. പല കളിയാക്കലുകൾക്കും പരിഹാസങ്ങൾക്കും മറുപടിയാണ് ഇന്ന് ഞാൻ എത്തിനിൽക്കുന്ന ഈ സ്പേസ്. മലയാള ടി.വി. ചാനലുകളുടെ ചരിത്രത്തിൽ ആദ്യമായി ഒരു പെൺകുട്ടി കോമഡി സ്കിറ്റുകൾക്ക് സ്ക്രിപ്റ്റ് എഴുതുന്നത് രജനികൃഷ്ണയാണ്. എഴുത്തുകാരി എന്നതിലുപരി ഇന്ന് രജനി സംവിധാ യിക കൂടിയാണ്. മാമുക്കോയ, ധ്യാൻ ശ്രീനിവാസൻ തുടങ്ങി വലിയ താരനിര അണിനിരന്ന തുടക്കം മംഗല്യം എന്ന വെബ് സീരീസിന്റെ സംവിധായികക്കുപ്പായമണിഞ്ഞ് രജനി മലയാളത്തിന്റെ സംവിധായക നിരയിലേക്ക് ചുവടുവച്ചിരിക്കുകയാണ്.പുതിയ വിശേഷങ്ങളും ഭാവി പരിപാടികളെക്കുറിച്ചും രജനി കൃഷ്ണ മനസ്സ് തുറക്കുന്നു.

സ്വപ്നങ്ങളെ എത്തിപ്പിടിച്ച രജനി

 ടെലിവിഷനുകളിലെ കോമഡി പരിപാടികൾക്ക് സ്ക്രിപ്റ്റ് എഴുതുന്ന ആദ്യപെൺകുട്ടി ഞാനാണ്. എഴുതി എഴുതി അതി നോട് വല്ലാത്തൊരു ഇഷ്ടം കൂടിയാണ് വെബ് സീരീസും ഇപ്പോൾ സിനിമയും സംഭവിക്കാൻ പോകുന്നത്. സംവിധായിക എന്ന നിലയിൽ അറിയപ്പെടുന്നതിനോളം സന്തോഷം തരുന്ന മറ്റൊരു കാര്യവും ജീവിതത്തിൽ സംഭവിച്ചിട്ടില്ല. മാമുക്കോയ സാർ, ധ്യാൻ ശ്രീനിവാസൻ തുടങ്ങി വലിയ താരങ്ങളെ വച്ച് യൂ ട്യൂബ് സീരീസ് ചെയ്യുന്ന ആദ്യത്തെ സംവിധായിക എന്ന അഭിമാനവുമുണ്ട് ഇപ്പോൾ. മാമുക്കോയ സാറിനെപ്പോലെ ലെജന്റായ ഒരു കലാകാരന്റെ ഒടുവിലത്തെ വർക്ക് എന്റേതെന്നതിൽ ഏറെ അഭിമാനമുണ്ട്. തുടക്കം മംഗല്യം സിനിമയാക്കാനായിരുന്നു എന്റെ പ്ലാൻ. എന്നാൽ പിന്നീടത് വെബ് സീരീസ് ആക്കുകയായിരുന്നു. എല്ലാം സംഭവിച്ചുപോവുന്നതായിരുന്നു.