കൗതുകതയും അവിസ്മരണീയതയും പേറി

Jannat-E-Kashmir (ഭൂമിയിലെ പറുദീസ)

- സംഗീത മധു

അടുത്തദിവസം ചൊവ്വാഴ്ച (ഏപ്രിൽ 11). രാവിലെ പ്രഭാതഭക്ഷണത്തിനായി റെസ്റ്റോറന്റിൽ പോയി. അവിടെ ധാരാളം മലയാളി വിനോദസഞ്ചാരികളെ കാണാൻ കഴിഞ്ഞു. അവർ തലേന്ന് എത്തിയതാണ്. കേരളത്തിൽ നിന്നും മാത്രമല്ല, പല സ്ഥലങ്ങളിൽ നിന്ന് എത്തിയവരും അക്കൂട്ടത്തിലുണ്ട്. സംസാരത്തിനിടെ അവർക്ക് ഇന്നലെയാണ് ഗൊണ്ടാല് ടിക്കറ്റ് ശരിയായതെന്നും അങ്ങോട്ട് പോവുകയാണെന്നും പറഞ്ഞു.

അക്കാര്യത്തിൽ അതിശയം തോന്നി. പുറത്തു വന്ന് അതിന്റെ കാരണം അന്വേഷിച്ചു. വിനോദ സഞ്ചാരികളുടെ തിരക്കുമൂലം സർക്കാർ ഇരുന്നൂറ്റപത് എക്സ്ട്രാ ടിക്കറ്റ് പോർട്ടൽ കഴിഞ്ഞ ദിവസമാണ് തുറന്നതാണ് അവർക്ക് കാര്യങ്ങൾ ലളിതമാക്കിയത്. കഷ്ടം ഞങ്ങൾ എത്ര മണിക്കൂറോളമാണ് കാത്തിരുന്നത്. ചില യാത്രകൾ ചിലർക്ക് കാര്യങ്ങൾ എളുപ്പമാക്കുകയും ചിലരെ ബുദ്ധിമുട്ടിക്കുകയും ചെയ്യും. അതിലൊന്നാണിത്. ഞങ്ങൾ കഴിഞ്ഞ ദിവസം വിളിച്ചവരെ വീണ്ടും വിളിച്ചു. അവരും ഇക്കാര്യം അറിഞ്ഞിരുന്നുവത്രേ. പക്ഷേ ടിക്കറ്റ് എടുക്കാൻ മേലധികാരികൾ അവരെ ചുമതലപ്പെടുത്തിയില്ലെന്നാണ് അവർ ന്യായം. ശരിക്കും പറഞ്ഞ അപ്പോൾ ഓർമ്മ വന്നത് "ശുപ്പാണ്ടി' കഥകൾ തന്നെയാണ്. എന്നാൽ അന്ന് സോൻമാർഗ്ഗിലേക്ക് പോകാൻ തയ്യാറായതിനാൽ മറ്റൊന്നും ചിന്തിച്ച് മനസ്സിനെ വിഷമിപ്പിച്ചില്ല. ഗൊണ്ടാല യാത്ര അടുത്തതവണയും ആകാമല്ലോ.

സോൻമാർഗ്ഗ് കൂടുതൽ ഉയരമുള്ള പ്രദേശമാണ്. സോൻമാർഗ്ഗിലേക്ക് പോകുന്ന വഴിയിൽ ധാരാളം സ്ഥലങ്ങളിൽ കാർഗിൽ എന്നെഴുതിയ ബോർഡുകൾ ഉണ്ടായിരുന്നു.  യുദ്ധഭൂമിയായ കാർഗിലിനെ പരാമർശിക്കുന്ന വിഷയങ്ങൾ കൗതുകമുയർത്തി. അന്വേഷിച്ചപ്പോൾ അറിയാൻ കഴിഞ്ഞത് കാർഗിലിലേക്ക് പോകുന്ന വഴിയാണ് സോൻമാർഗ്ഗ്.

സോൻമാർഗ്ഗിലെ താപനില അവിടെ രണ്ട് ഡിഗ്രി സെൽഷ്യസ് വരെ കുറയുമെന്ന് കേട്ടിരുന്നു. റോഡു പണികൾ നടക്കുന്ന ഇടുങ്ങിയ പാതകൾ. മലയിലുടെയുള്ള സഞ്ചാരസമയം കുറയ്ക്കാൻ ടണലുകൾ നിർമ്മിക്കുന്നത് കാണാമായിരുന്നു. അവ ശരിയായാൽ ഗതാഗതം കൂടുതൽ സുഗമമാകും. അന്ന് ധാരാളം സഞ്ചാരികൾ സോൻമാർഗ്ഗിനെ ലക്ഷ്യം വച്ച് പോകുന്നുണ്ടായിരുന്നു. അതുകൊണ്ടുതന്നെ വാഹനങ്ങൾ ഓടിക്കുന്നവർ തമ്മിൽ വാക്കുതർക്കങ്ങളും ഉണ്ടായിരുന്നു.