ദേ മച്ചാനേ...ഉണ്ടാപ്പിയും ടീമും

കോഴ്സ് കഴിഞ്ഞ് ക്യാമ്പസിൽ നിന്നും വേദനയോടെ പടിയിറങ്ങുമ്പോഴും ഈ മച്ചാനും പിള്ളേരും അകലുന്നില്ല. അവർ കേരളത്തിലെ വിവിധ ജില്ലകളിലായി മച്ചാനും പിള്ളേരും എന്ന പേരിൽ ഡാൻസ് അക്കാഡമി ആരംഭിക്കാനുള്ള ഒരുക്കത്തിലാണ്

- നാസർ മുഹമ്മദ്

ഉണ്ടാപ്പീ .. മച്ചാനെ കണ്ടോ.. മീനൂ.. മച്ചാൻ കാന്റീനിലുണ്ട്. മീനാക്ഷി കാന്റീനിലേക്ക് ഓടി. പുറകിൽ ഉണ്ടാപ്പിയും. മീനൂ.. കാര്യം പറ. എനി പ്രോബ്ലം.. ഏയ്.. ഒന്നുമില്ല. ചുമ്മാ.. ഓട്ടത്തിനിടയിൽ മീനാക്ഷി ഉണ്ടാപ്പിയോട് പറഞ്ഞു.

ഇൻസ്റ്റയിലൂടെ വൈറലായി മാറിയ കാലടി ശ്രീശങ്കരാചാര്യ കോളേജിലെ എം.എ. മോഹിനിയാട്ടം വിദ്യാർത്ഥിനികളായ മിടുക്കികളേയും അവരുടെ മച്ചാനെയും പരിചയപ്പെടാം.

ദേ... മച്ചാനെ ഉണ്ടാപ്പിയും മീനുവും ഇങ്ങോട്ടാണല്ലോ ഓടിവരുന്നത്. വല്ല കുഴപ്പവും ഉണ്ടോ... കയ്യിലുള്ള ഉണ്ടപ്പൊരി കഴിച്ചുകൊണ്ട് ദേവിക മച്ചാനോട് പറഞ്ഞു. ഉണ്ടാപ്പി വല്ല പണിയും ഒപ്പിച്ചുകാണും. നമ്മൾ ഇടപെടേണ്ടി വരും. ആവി പറക്കുന്ന ചായ കുടിച്ച ശേഷം മച്ചാൻ പറഞ്ഞു.

കാന്റീനിലേക്ക് ഓടി എത്തിയ മീനാക്ഷി കയ്യിലെ ഫോൺ മച്ചാനെ കാണിച്ച് കിതച്ചു കൊണ്ട് പറഞ്ഞു. നമ്മുടെ ഈ വീഡിയോ ഇന്നലെ ലക്ഷക്കണക്കിന് ആളുകളാണ് കണ്ടത്. ഉണ്ടാപ്പിക്ക് മീനാക്ഷി ഓടിയ കാര്യം അപ്പോഴാണ് പിടികിട്ടിയത്. അനുശ്രീയും മീരയും കൃഷ്ണേന്ദുവും വർണ്ണയും, മിഥുന, രശ്മി, ആരഭി, ധനലക്ഷ്മി, ശ്രീലക്ഷ്മി, ടി.ജി.ജോസഫുമെല്ലാം അപ്പോഴേയ്ക്കും കാന്റീനിലേക്ക് പറന്നെത്തി. അതോടെ കാന്റീനിൽ മച്ചാൻ ടീം സെറ്റായി.

കാന്റീനിൽ സംസാരിച്ചുകൊണ്ടിരുന്ന ചില ചേട്ടൻമാർ ഉണ്ടാപ്പിയെ വിളിച്ചുചോദിച്ചു ഞങ്ങൾ ചെലവ് ചെയ്യണോ..

അയ്യോ... ചേട്ടൻമാരേ.. സന്തോഷം. ഉണ്ടാപ്പി കൈകൂപ്പി പറഞ്ഞു.

ഭക്ഷണം കണ്ടാൽ എനിക്ക് ഭയങ്കര വിശപാ.. പിന്നെ ഒന്നും നോക്കില്ല. ആസ്വദിച്ച് കഴിക്കും. അല്ലേലും ഞങ്ങൾ കോഴിക്കോട്ടുകാർ നല്ല ഭക്ഷണം ഉണ്ടാക്കുന്നവരും മറ്റുള്ളവരെ കഴിപ്പിക്കുന്നതിൽ സന്തോഷം കണ്ടെത്തുന്ന വരും പിന്നെ കൂട്ടത്തിൽ കഴിക്കാനും ഇഷ്ടമു ള്ളവരാണല്ലോ. അതുകൊണ്ടൊക്കെയായിരിക്കാം ഭക്ഷണത്തോട് ഒരു മൊഹബത്ത്. ആ മൊഹബത്ത് വല്ലതും ശരീരം വല്ലതും അറിയുന്നുണ്ടോ... അങ്ങേരങ്ങട് വണ്ണം വയ്ക്കാൻ തുടങ്ങി. എന്തുപറയാൻ. വണ്ണം വച്ചപ്പോൾ ഇച്ചിരി സൗന്ദര്യം കൂടി. അതുകൊണ്ട് കൂട്ടത്തിലുള്ള ജൂതാസുകൾ സ്നേഹത്തോടെ എനിക്കൊരു പേരിട്ടു.