വൈറൽ അല്ല, റിയൽ

ഇക്കഴിഞ്ഞ റിപ്പബ്ലിക് ദിനത്തിനു ശേഷം ഈ അമ്മയ്ക്കു മനസ്സിലൊരു നോവുണ്ടായി. അതിനു കാരണം ആരാണ് ?

- രൂപാ ദയാബ്ജി

ഒരു സോഷ്യൽ മീഡിയ പോസ്റ്റ് വൈറലാകുമ്പോൾ നിമിഷനേരം കൊണ്ടാണു ചിലരുടെ ജീവിതം മാറുന്നത്. അങ്ങനെയൊരു വൈറൽ പോസ്റ്റു പിറന്നു. കഴിഞ്ഞ റിപ്പബ്ലിക് ദിനത്തിൽ തിരുവനന്തപുരത്തു പരേഡ് നയിച്ച മേജർ സി. എസ്. ആനന്ദ് അമ്മ സുശീലയെ ചേർത്തു നിർത്തിയ വൈറൽ ചിത്രം പ്രചരിച്ചത് ഈ തലക്കെട്ടിൽ "വേറിട്ടൊരു കാഴ്ച തൂപ്പുകാരിയായി ജോലി ചെയ്തു മകനെ മേജറാക്കിയ അമ്മ".

ആ അമ്മയെ തേടിയുള്ള അന്വേഷണത്തിനൊടുവിൽ മറുപടി ഒരു വലിയ ‘നോ.' “തെറ്റായ കാര്യങ്ങൾ ആരൊക്കെയോ എഴുതി. ലോകം മുഴുവൻ പ്രചരിപ്പിച്ചു. ഇനി എന്തു സംസാരിക്കാൻ പിന്നെ തീരുമാനം തിരുത്തി. “വ്യക്തികളുടെ അനുവാദമില്ലാതെ എഴുതുന്നവർക്കുള്ള മറുപടി എനിക്കു പറയാനുണ്ട്.'' തച്ചോട്ടുകാവ് പിടാരത്തെ ആശിർവാദ് എന്ന വീട്ടിലിരുന്നു സുശീല എന്ന അമ്മ സംസാരിച്ചതു വൈറലായ കഥയല്ല, റിയലായ ജീവിതകഥയാണ്.

“കരമനയിലാണു നാട്. എനിക്കു മാസങ്ങൾ മാത്രം പ്രായമുള്ളപ്പോഴാണു പൊലീസുകാരനായിരുന്ന അച്ഛൻ കുട്ടൻ പിള്ള മരിച്ചത്. പത്താം ക്ലാസ്സ് പാസ്സായ പിറകേ ഡിഗ്രിക്കു ചേർന്നെങ്കിലും പെട്ടെന്നു ജോലി വേണമെന്ന ആഗ്രഹം കൊണ്ടു ടൈപ് റൈറ്റിങ് പഠിക്കാൻ ചേർന്നു. 1978 കാലമാണ്, ടൈപ് റൈറ്റിങ് ഹയറും ഇംഗ്ലിഷും മലയാളവും ഷോർട് ഹാൻഡും പാസ്സായി. ജോലിക്കു പല ടെസ്റ്റുകളും എഴുതി. പക്ഷേ, ഒന്നും കിട്ടിയില്ല.

ആ സമയത്തു ജീവിതത്തിൽ മറ്റൊരു നല്ല കാര്യം സംഭവിച്ചു. അന്തിയൂർക്കോണംകാരനായ ചന്ദ്രശേഖരൻ നായർ പട്ടാളത്തിൽ സിൽസ് വിഭാഗത്തിൽ ക്ലറിക്കൽ പോസ്റ്റിലാണ് അന്ന്. 1982ൽ വിവാഹം കഴിഞ്ഞു. അദ്ദേഹത്തിന്റെ വീടിനടുത്തുള്ള നഴ്സറിയിൽ പഠിപ്പിക്കാൻ ചേർന്നു. അതാണ് ആദ്യജോലി. അതിനിടെ മോൾ ജനിച്ചു, രചന. കുറച്ചു മാസങ്ങൾ കൂടി കഴിഞ്ഞപ്പോൾ എൻഎസ്എസിന്റെ നഴ്സറിയിലേക്കു ജോലിക്ക് അവസരം വന്നു. അതു സ്വീകരിക്കാൻ സാധിച്ചില്ല.'' സുശീല ഒന്നു നിർത്തി.

അതായിരുന്നു മോഹം