വാട്സാപ്പിലെ ന്യൂജെൻ മാറ്റങ്ങൾ

വാട്സാപ്പിൽ ഈയിടെ വന്ന അപ്ഡേറ്റുകൾ എന്തൊക്കെ എന്നു പരീക്ഷിച്ചു നോക്കിയാലോ ?

- രതീഷ് ആർ. മേനോൻ ടെക്, സോഷ്യൽ മീഡിയ വിദഗ്ധൻ

എന്നും പുതിയ ഫീച്ചേഴ്സ് കൊണ്ടുവന്നു സ്വന്തം  പ്ലാറ്റ്ഫോമുകൾ ഉപയോക്താക്കൾക്കു പ്രിയമുള്ളതാക്കാൻ ശ്രമിക്കുന്ന കാര്യത്തിൽ മെറ്റ മുൻപന്തിയിലാണ്. അവർ വാട്സാപ്പിൽ ഈയിടെ ധാരാളം മാറ്റങ്ങൾ കൊണ്ടുവന്നിട്ടുണ്ട്. പലരും അത് ശ്രദ്ധിച്ചു പോലുമില്ലാത്ത ആ മാറ്റങ്ങൾ എന്തൊക്കെ എന്നുനോക്കാം.

വിഡിയോ മെസേജ് ഇതു പുതിയ ഫീച്ചർ ആണോ, വിഡിയോ മെസ്സേജ് മുൻപേ അയയ്ക്കുന്നതാണല്ലോ എന്നാകും നിങ്ങളിപ്പോൾ ചിന്തിക്കുന്നത്. എന്നാൽ ഇതൊരു സാധാരണ വിഡിയോ സെൻഡിങ് ഫീച്ചർ അല്ല. പ്ലേസ്റ്റോറിൽ നിന്നു വാട്സാപ് അപ്ഡേറ്റ് ചെയ്ത ശേഷം മാത്രം ഇതു ട്രൈ ചെയ്യുക.

മെസേജ് ടൈപ് ചെയ്യുന്നതിന്റെ വലതുവശത്തു വോയ്‌സ് മെസ്സേജ് റിക്കോർഡ് ചെയ്യാനുള്ള മൈക്ക് ചിഹ്നം എല്ലാവർക്കും അറിയാമല്ലോ. അതിൽ ടച് ചെയ്തു നോക്കൂ, ആ ഐക്കൺ വിഡിയോ ക്യാമറയുടെ രൂപത്തിലേക്കു മാറുന്നതു കാണാം. ഇനി അതിൽ അമർത്തിപ്പിടിച്ചാൽ 3,2,1 എന്നു കൗണ്ട് ഡൗണും ഒപ്പം വൃത്താകൃതിയിൽ ക്യാമറ ഇന്റർഫെയ്‌സും കാണാം.