കണ്ടിട്ടും കണ്ടിട്ടും കൊതി തീരുന്നില്ലല്ലോ...

കടം വാങ്ങിയായിരുന്നു ഗിരിജയുടെ ആദ്യ വിദേശ യാത്ര ഇപ്പോൾ 31 രാജ്യങ്ങളും ഇന്ത്യൻ വിസ്മയങ്ങളും കണ്ട് ആ സഞ്ചാരം തുടരുന്നു

-  രാഖി റാസ്

"പലിശയ്ക്കു കടം വാങ്ങി ലോകത്താരെങ്കി ടൂർ പോകുമോ ഗിരിജേ...?' എന്നു സുലൈമാൻ ചോദിച്ചു.

"ന്നാന്റെ പേരങ്ങ്ട് എഴുതി വച്ചോളൂ സുലൈമാനേ...' എന്നു ഗിരിജച്ചേച്ചി പറഞ്ഞു.

അങ്ങനെയാണ് എടപ്പാളിലെ ഗിരിജയുടെ യാത്രാനുഭവങ്ങൾ തുടങ്ങുന്നത്. നൂറു രൂപ കിട്ടിയാൽ ഉടൻ യാത്ര പോകുന്നതിനെക്കുറിച്ചു മാത്രം ചിന്തിക്കുന്ന അറുപത്തിമൂന്നുകാരി. പത്തു മിനിറ്റ് ഇവരോടൊന്നു സംസാരിച്ചാൽ ആർക്കും തോന്നും ഒന്നു ലോകം ചുറ്റ്യാലോ എന്ന്.

“ആളോടെ വിചാരം, യാത്ര പോകാൻ പണം വേണം എന്നാണ്. പണത്തേക്കാൾ പ്രധാനം യാത്ര ചെയ്യാനുള്ള ആഗ്രഹമാണ്. ആഗ്രഹമുണ്ടെങ്കിൽ പണം താനേ വരും. കാരണം യാത്ര ഒരു ലഹരിയാണ്'' ഗിരിജ പറയുന്നു.

യാത്രയിലേക്കു വിളിച്ച് ചാവുകടൽ

വെള്ളത്തിൽ പൊങ്ങിക്കിടക്കാൻ കഴിയുന്ന കടലോ! അതൊന്നു കാണണല്ലോ. ചാവുകടലിനെക്കുറിച്ചുള്ള ഈ അറിവാണു യാത്രാമോഹം ഉണർത്തിയത്. ആ സമയത്താണു മനോരമ പത്രത്തിൽ 'സഫലമീ യാത്ര എന്ന പാക്കേജ് ടൂറിന്റെ പരസ്യം കണ്ടത്. ഇസ്രയേൽ, പലസ്തീൻ, ജോർദാൻ, ഈജിപ്ത് എന്നീ രാജ്യങ്ങൾ സന്ദർശിക്കാം. 33,000 രൂപ ചെലവ്. പണം പലിശയ്ക്ക് വാങ്ങാം എന്നു നിശ്ചയിച്ചു സുലൈമാനിക്കയെ സമീപിച്ചപ്പോഴാണ് മൂപ്പര് ആ ഡയലോഗെടുത്തു വീശിയത്. 300 രൂപ ഒരു ദിവസം എന്ന കണക്കിൽ നൂറു ദിവസം കൊണ്ട് തിരിച്ചടയ്ക്കണം എന്ന വ്യവസ്ഥയിൽ 30,000 രൂപ വാങ്ങിയായിരുന്നു ജീവിതത്തിലെ ആദ്യയാത്ര.