കൊഴുക്കട്ട ശനി മുതൽ ഈസ്റ്റർ വരെ രുചിസമൃദ്ധി

ഈസ്റ്ററിനോട് അനുബന്ധിച്ച് ഒരാഴ്ചയ്ക്കുമേൽ നീണ്ടു നിൽക്കുന്ന ഓരോ ആചാരങ്ങൾക്കും വിളമ്പുന്ന വിഭവങ്ങളുടെ പാചകക്കുറിപ്പുകൾ

- തയാറാക്കിയത്: മെർലി എം. എൽദോ

ഓശാന ഞായറിനു തലേദിവസമാണ് കൊഴുക്കട്ട ശനിയാഴ്ച. അതിനോട് അനുബന്ധിച്ച് വൈകുന്നേരം തേങ്ങയും ശർക്കരയും നിറച്ച കൊഴുക്കട്ട തയാറാക്കും.

കൊഴുക്കട്ട 

1. അരിപ്പൊടി - ഒരു കപ്പ്
   ഉപ്പ് - പാകത്തിന്
   വെളിച്ചെണ്ണ - ഒരു ചെറിയ സ്പൂൺ
   തിളച്ച വെള്ളം - ഒന്നരക്കപ്പ്
   ഫില്ലിങ്ങിന്
   2. മട്ട അരി - രണ്ടു ചെറിയ സ്പൂൺ
   ചുക്കുപൊടി - അര ചെറിയ സ്പൂൺ
   ജീരകം - കാൽ ചെറിയ സ്പൂൺ
   ഏലയ്ക്ക - ഒന്ന്
   3. ശർക്കര - 100 ഗ്രാം
   വെള്ളം - കാൽ ഗ്ലാസ്
   4. തേങ്ങ ചുരണ്ടിയത് - ഒരു കപ്പ്
   5. നെയ്യ് - ഒരു ചെറിയ സ്പൂൺ 

പാകം ചെയ്യുന്ന വിധം

 ഒന്നാമത്തെ ചേരുവ യോജിപ്പിച്ചു നന്നായി കുഴച്ചു കൊഴുക്കട്ടയ്ക്കുള്ള മാവു തയാറാക്കി വയ്ക്കുക.

ഫില്ലിങ് തയാറാക്കാൻ രണ്ടാമത്തെ ചേരുവ എണ്ണയില്ലാതെ വറുത്തു പൊടിച്ചു വയ്ക്കണം.

ശർക്കര വെള്ളം ചേർത്തുരുക്കി അരിച്ച ശേഷം തേങ്ങ ചുരണ്ടിയതും വറുത്തു പൊടിച്ച് പൊടികളും ചേർത്തിളക്കുക. നെയ്യും ചേർത്തു നന്നായി യോ ജിപ്പിച്ചു ചെറിയ ഉരുളകളാക്കി വയ്ക്കണം.

മാവു കുഴച്ചത് ഒരു ഉരുളയെടുത്ത് അതിനുള്ളിൽ തയാറാക്കിയ തേങ്ങ ബോൾ വച്ചുരുട്ടി പൊതിഞ്ഞ് ആവിയിൽ 15-20 മിനിറ്റ് വേവിക്കുക.

പെസഹ വ്യാഴാഴ്ചയാണ് പെസഹ അപ്പവും പാലും തയാറാക്കുന്നത്. യെഹൂദ ആചാരപ്രകാരം യേശുവും ശിഷ്യന്മാരും ഒരുമിച്ചി രുന്നു പെസഹ ആചരിച്ചതിന്റെ ഓർമ പുതുക്കുന്നതാണ് ഇത്. ചില സ്ഥലങ്ങളിൽ അപ്പം ആവിയിൽ പുഴുങ്ങിയും ചിലയിടങ്ങളിൽ മൺചട്ടിയിൽ ചുട്ടുമാണ് അപ്പം തയാറാക്കുന്നത്. ഓശാന ഞായറാഴ്ച പള്ളിയിൽ നിന്നു ലഭിക്കുന്ന കുരുത്തോല കുരിശാകൃതിയിൽ പുഴുങ്ങാനുള്ള അപ്പത്തിനു മുകളിൽ വയ്ക്കുന്നതു ഒരാചാരമാണ്.

പെസഹ അപ്പം

1. പച്ചരി - ഒരു കപ്പ്
   ഉഴുന്ന് - കാൽ കപ്പ്
   2. തേങ്ങ ചുരണ്ടിയത് - അരക്കപ്പ്
   വെളുത്തുള്ളി - രണ്ട് അല്ലി
   ചുവന്നുള്ളി - രണ്ട്
   ജീരകം - കാൽ ചെറിയ സ്പൂൺ
   വെള്ളം - കാൽ കപ്പ്

   3. ഉപ്പ് - പാകത്തിന്

പാകം ചെയ്യുന്ന വിധം

 പച്ചരിയും ഉഴുന്നും മൂന്ന് നാലു മണിക്കൂർ കുതിർത്ത ശേഷം അരച്ചു വയ്ക്കുക. രണ്ടാമത്തെ ചേരുവ മയത്തിൽ അരച്ചു വയ്ക്കുക.