ക്രിപ്റ്റോയിൽ കൈനിറയെ കാശ് വാരുന്ന ട്രേഡർ

ഫ്ളാറ്റുകൾ റെന്റിനു നൽകുന്നതായിരുന്നു ഇർഷാദ് തുടങ്ങിയ ബിസിനസ്

അനുദിനം വളരുന്ന സ്റ്റോക്ക് മാർക്കറ്റ് ട്രേഡിങ് ബിസിനസിനെ കുറിച്ചുള്ള ഒട്ടേറെ കഥകൾ കേട്ടു കഴിഞ്ഞു. ഒട്ടുമിക്ക കഥകളുടെയും ആശയങ്ങളും കഥാപാത്രങ്ങളും ഒന്നു തന്നെ. ഇനി പറയാൻ പോകുന്നതും സ്റ്റോക്ക് മാർക്കറ്റ് ട്രേഡറുടെ കഥയാണ്. വ്യത്യസ്ഥനാണ് ഈ ട്രേഡർ. പാടിപതിഞ്ഞ കഥയിൽ നിന്നും ഭിന്നമാണ് കോഴിക്കോട് കൊടുവള്ളിക്കാരനായ മുഹമ്മദ് ഇർഷാദിന്റെ കഥ. ജീവിതത്തിൽ ഒരിക്കൽ പോലും ട്രേഡറാകുമെന്നു സ്വപ്നം പോലും കണ്ടിട്ടില്ലാത്ത യുവാവ്. സാഹചര്യങ്ങളിൽ ട്രേഡിങിലേക്കെത്തുകയും കോടികളുടെ ബിസിനസ് നേടുകയും ചെയ്ത കഥ. ഒപ്പം പുതിയ തലമുറയ്ക്കായി ട്രേഡിങ് തന്ത്രങ്ങൾ പഠിപ്പിക്കുന്നതിലേക്കെത്തി നിൽക്കുന്നു ഇർഷാദിന്റെ ജീവിതം.

സ്വപ്നങ്ങൾ കണ്ട യുവത്വം

ചെറുപ്പം മുതൽ ബിസിനസ് തന്നെയായിരുന്നു ഇർഷാദിന്റെ മനസിൽ. പെട്ടെന്നൊരു ജോലിയും ബിസിനസും മനസിൽ കിടന്നതിനാൽ പ്ലസ് ടുവിന്ശേ ഷം ചില ടെക്നിക്കൽ കോഴ്സുകളാണ് പഠിച്ചത്. ജോലിക്കായി വിദേശത്തേക്കു പോകുക. അല്ലെങ്കിൽ നാട്ടിലൊരു ബിസിനസ് ഇതു രണ്ടുമായിരുന്നു മനസിൽ. നാട്ടിൽ ചെറിയ ജോലികൾ ചെയ്ത ശേഷം പ്രവാസ ജീവിതത്തിനായി കോഴിക്കോട്ടു നിന്നും വിമാനം കയറി. സൗദിയിലെ ഒരു കമ്പനിയിലായിരുന്നു ജോലി. അഞ്ച് വർഷത്തോളം ജോലി ചെയ്തു. നാട്ടിലൊരു സംരംഭം എന്ന മോഹം അന്നും വിട്ടൊഴിഞ്ഞിരുന്നില്ല. സൗദി വിട്ടു നാട്ടിലേക്കു പോരുമ്പോൾ സംരംഭം എന്ന ആശയം തന്നെയായി രുന്നു മനസിൽ. നാട്ടിലെത്തി ഇർഷാദ് വൈകാതെ വിവാഹിതനായി. ബിസിനസ് നടത്തി നാട്ടിൽ തന്നെ ജീവിക്കാനായിരുന്നു പ്ലാൻ. സംരംഭത്തിന് പറ്റിയ ഇടം കൊച്ചിയാണെന്നു മനസിലാക്കി. കൊച്ചിയിലെത്തി. ഫ്ളാറ്റുകൾ റെന്റിനു നൽകുന്നതായിരുന്നു ഇർഷാദ് തുടങ്ങിയ ബിസിനസ്. വേറിട്ടൊരു സംരംഭം.